පවතින දැඩි වියළි කාලගුණික තත්ත්වය හේතුවෙන් උතුරු සහ නැගෙනහිර ඇතුළු දිවයිනේ ප්රදේශ රැසක මතුව ඇති පානීය ජල හිඟයට විසඳුම් ලෙස ජලය බෙදාහැරීමේ කටයුතු අඛණ්ඩව ක්රියාත්මක කරන බව ආපදා කළමනාකරණ මධ්යස්ථානය පවසයි. අද (09) රජයේ ප්රවෘත්ති දෙපාර්තමේන්තුවේ පැවති මාධ්ය හමුවකදී අදහස් දක්වමින් එම මධ්යස්ථානයේ අධ්යක්ෂ ජනරාල් ප්රදීප් කොඩිප්පිලි මහතා සඳහන් කළේ, ප්රාදේශීය ලේකම් කාර්යාල සහ ජල සම්පාදන මණ්ඩලය ඒකාබද්ධව මෙම සහන සේවා මෙහෙයවන බවයි.
යම් ප්රදේශයක ජනතාවට පානීය ජල ගැටලු පවතින්නේ නම් 117 කෙටි දුරකථන අංකය ඔස්සේ ආපදා කළමනාකරණ මධ්යස්ථානයට ඒ බව දැනුම් දෙන ලෙසද හෙතෙම ඉල්ලා සිටියේය. පවතින උණුසුම් තත්ත්වය හමුවේ ජලය අරපිරිමැස්මෙන් භාවිත කිරීමේ වැදගත්කම ද මෙහිදී අවධාරණය කෙරුණි.
මීට අමතරව, වියළි කාලගුණයත් සමඟ වාර්තා වන ලැව්ගිනි පිළිබඳව දැඩි අවධානයෙන් පසුවන ලෙස ආපදා කළමනාකරණ මධ්යස්ථානය ජනතාවගෙන් ඉල්ලා සිටියි. 2025 වසරේ පමණක් ලැව්ගිනි 164ක් වාර්තා වී ඇති බවත්, බොහෝමයක් ලැව්ගිනි මිනිස් නොසලකා හැරීම් මත සිදුවන බවත් ඔහු පෙන්වා දුන්නේය. වන වගාවන් විනාශ වීම ඉදිරි ආපදා තත්ත්වයන්ට අතවැනීමක් බැවින්, ලැව්ගිනි පාලනය සඳහා පොලීසිය සහ වනජීවී දෙපාර්තමේන්තුව ඒකාබද්ධව මෙහෙයුම් ක්රියාත්මක කරන බවද අධ්යක්ෂ ජනරාල්වරයා වැඩිදුරටත් ප්රකාශ කළේය.
