කුඩා තේ වතු හිමියන් දිරිමත් කිරීම සඳහා දැනට ලබාදෙන සහනාධාරයට අමතරව, රුපියල් 5000ක විශේෂ මූල්ය සහනාධාරයක් ලබාදීමට රජය තීරණය කර තිබේ. වැවිලි සහ ප්රජා යටිතල පහසුකම් අමාත්යාංශය සඳහන් කරන්නේ පවතින මැදපෙරදිග යුදමය තත්ත්වය සැලකිල්ලට ගනිමින් මෙම අමතර සහනාධාරය වසර අවසානයට පෙර ගොවීන් වෙත ලබාදීමට භාණ්ඩාගාරය ප්රතිපාදන වෙන් කර ඇති බවයි. මෙයද නව QR ක්රමවේදය යටතේම ක්රියාත්මක වීමට නියමිතය.
පසුගිය මාර්තු 31 වනවිට ලැබී ඇති දත්තයන්ට අනුව, QR ක්රමවේදය හරහා පොහොර ලබාගැනීම සඳහා ගොවීන් 226,511 දෙනෙකු ලියාපදිංචි වී ඇති අතර, ඉන් 187,759 දෙනෙකු සඳහා මේ වනවිට සහනාධාර පොහොර මෙට්රික් ටොන් 21,117.7ක් සාර්ථකව බෙදාහැර අවසන්ය. රජය දැනට කිලෝග්රෑම් 50ක පොහොර මිටියක් සඳහා රුපියල් 4000ක සහ කිලෝග්රෑම් 25ක මිටියක් සඳහා රුපියල් 2000ක සහනාධාරයක් පිරිනමයි. මෙම නව ක්රමවේදය නිසා පසුගිය වසරට සාපේක්ෂව පොහොර ලබාගත් ගොවීන් සංඛ්යාව සියයට 122.3කින් සහ බෙදාහැරීමේ ප්රගතිය සියයට 62.2කින් ඉහළ ගොස් ඇත.
මෙම වැඩපිළිවෙළේ මූලික අරමුණ වන්නේ 2030 වසර වනවිට මෙරට තේ නිෂ්පාදනය කිලෝග්රෑම් මිලියන 400 දක්වා වැඩිකිරීම සහ තේ අපනයන ආදායම ඇමරිකානු ඩොලර් බිලියන 2.5ක් දක්වා ඉහළ නැංවීමයි. සාධාරණ සහ විනිවිද පෙනෙන පොහොර බෙදාහැරීමේ ක්රමවේදයක් හරහා තේ කර්මාන්තයේ නිරත කුඩා හා මධ්ය පරිමාණ වතු හිමියන්ගේ ආර්ථිකය ශක්තිමත් කිරීම රජයේ අපේක්ෂාව බව අමාත්යාංශය වැඩිදුරටත් අවධාරණය කරයි.
