කෘතිම බුද්ධිය (AI) උපයෝගී කරගනිමින් සිදුකරන සයිබර් ප්රහාර ප්රමාණය වසරක් ඇතුළත 44% කින් ඉහළ ගොස් ඇති බව IBM පර්යේෂණ උපුටා දක්වමින් හාවඩ් බිස්නස් රිවීව් (Harvard Business Review) පුවත් සේවය වාර්තා කරයි. මෙලෙස AI තාක්ෂණය හරහා සිදුවන එක් දත්ත සොරකමක සාමාන්ය පිරිවැය ඇමරිකානු ඩොලර් මිලියන 4.88 ක් ලෙස ගණන් බලා තිබේ. කෙසේ වෙතත් ඇක්සෙන්චර් (Accenture) ආයතනය සිදු කළ සමීක්ෂණයකට අනුව සමාගම්වලින් 77% ක්ම සිය මූලික තාක්ෂණික යටිතල පහසුකම් ආරක්ෂා කර ගැනීමට අවශ්ය දත්ත සහ AI ආරක්ෂණ පද්ධති පවා සපුරා නොමැති බව හෙළි වී ඇත.
AI මඟින් එල්ල වන ප්රහාර අනාවැකි කිව නොහැකි මෙන්ම ඉතා වේගයෙන් පැතිරෙන ස්වභාවයක් ගන්නා බැවින් සාම්ප්රදායික නායකත්ව රටාවන් මෙයට මුහුණ දීමට ප්රමාණවත් නොවන බව විශේෂඥයෝ පෙන්වා දෙති. හාවඩ් ව්යාපාරික පාසලේ උපදේශක හයිස් ඕ. ගිබ්සන් මහතා පවසන්නේ වර්තමාන “BANI” (බිඳෙනසුලු, කනස්සල්ල සහගත, රේඛීය නොවන සහ තේරුම්ගත නොහැකි) පරිසරය තුළ සයිබර් ප්රහාර යනු නොවැළැක්විය හැකි දෙයක් බව උපකල්පනය කරමින් ආයතනික නායකයින් කටයුතු කළ යුතු බවයි. තාක්ෂණික අසාර්ථකත්වයට වඩා නායකත්වයේ පවතින සූදානම් නොවීම සයිබර් ආරක්ෂාවට විශාල තර්ජනයක් වී ඇති බව ඔහු වැඩිදුරටත් අවධාරණය කරයි.
මෙම අභියෝග ජය ගැනීම සඳහා සියලුම මට්ටම්වල නායකයින්ට AI පිළිබඳ අවබෝධයක් ලබා දීම, AI ආයෝජන මූලික ව්යාපාරික අරමුණු සමඟ සම්බන්ධ කිරීම සහ පාලන ක්රමවේද ශක්තිමත් කිරීම අත්යවශ්ය වේ. 2023 වසරේදී MGM රිසෝර්ට්ස් ආයතනයට එල්ල වූ රියන්සම්වෙයාර් (Ransomware) ප්රහාරයෙන් ඩොලර් මිලියන 100 කට අධික ආදායමක් අහිමි වූයේ ද මෙවැනි සූදානමක් නොමැතිකම නිසා බව ඔහු පෙන්වා දෙයි. එබැවින් වර්තමාන AI යුගයේ සයිබර් තර්ජනවලින් බේරීමට නම් ආයතනික නායකත්වයේ මූලික වෙනසක් සිදු විය යුතු බව මෙම වාර්තා පෙන්වා දෙයි.
