රුසියානු ජනාධිපති ව්ලැඩිමීර් පුටින් එළඹෙන ඕතඩොක්ස් පාස්කු සති අන්තය වෙනුවෙන් සියලු පෙරමුණු ඔස්සේ සටන් විරාමයක් ප්රකාශයට පත් කර ඇති අතර යුක්රේන ජනාධිපති වොලොඩිමියර් සෙලෙන්ස්කි ද ඊට ප්රතිචාර දක්වමින් “සමාන පියවරක්” ගැනීමට සූදානම් බව පවසා තිබේ. මොස්කව් වේලාවෙන් අප්රේල් 11 වන සෙනසුරාදා පස්වරු 4:00 සිට පාස්කු ඉරිදා අවසන් වන තෙක් මෙම සටන් විරාමය ක්රියාත්මක වීමට නියමිතය. ජනාධිපති සෙලෙන්ස්කි සිය ‘X’ ගිණුම හරහා සඳහන් කළේ ජනතාවට තර්ජනවලින් තොර පාස්කු උත්සවයක් අවශ්ය බවත්, මෙය සාමය කරා යන පළමු පියවර වනු ඇතැයි තමන් බලාපොරොත්තු වන බවත්ය.
කෙසේ වෙතත්, මෙම සටන් විරාමයේ ස්ථාවරභාවය පිළිබඳව යුක්රේනය පසුවන්නේ දැඩි සැකයකිනි. මීට පෙර අවස්ථාවලදී ද රුසියාව ඒකපාර්ශ්විකව සටන් විරාම ප්රකාශ කළද, ඒවා කෙටි කාලයකින් බිඳවැටුණු බවත් සිය ගණනින් සටන් විරාම නීති උල්ලංඝනය වූ බවත් යුක්රේන බලධාරීන් පෙන්වා දෙයි. රුසියාව ප්රහාර එල්ල කිරීම තාවකාලිකව නතර කරන්නේ සිය මිසයිල සහ ඩ්රෝන බලකායන් මීළඟ ප්රහාරය සඳහා සූදානම් කර ගැනීමට පමණක් බවට ද කියෙව් පාලනය චෝදනා කරයි.
දිගුකාලීන ආක්රමණය හේතුවෙන් දැඩි ලෙස පීඩාවට පත්ව සිටින දෙරටේම සොල්දාදුවන්ට සහ සිවිල් වැසියන්ට මෙම කෙටි විරාමය සහනයක් වනු ඇතැයි විශ්වාස කෙරේ. මෑත සතිවලදී රුසියාව විසින් යුක්රේනයේ බලශක්ති පද්ධතිය ඉලක්ක කර දැවැන්ත ප්රහාර එල්ල කළ අතර, යුක්රේනය ද රුසියාවේ බලශක්ති අපනයන මධ්යස්ථාන වෙත ඩ්රෝන ප්රහාර එල්ල කරමින් ප්රතිචාර දක්වා තිබුණි. මෙම සටන් විරාමය ස්ථාවර සාම සාකච්ඡා දක්වා වර්ධනය වේද යන්න පිළිබඳව ලෝක ප්රජාව දැඩි අවධානයෙන් පසුවන නමුත්, ප්රධාන මැදිහත්කරු ලෙස කටයුතු කළ ඇමරිකානු ජනාධිපති ඩොනල්ඩ් ට්රම්ප් සිය අවධානය මේ වන විට මැදපෙරදිග අර්බුදය වෙත යොමු කර තිබීම මෙම සාම ක්රියාවලියට යම් බාධාවක් වී තිබේ.
