Meta සමාගම සිය නවතම AI මාදිලිය වන ‘Muse Spark’ සියලුම වේදිකාවන් වෙත හඳුන්වා දෙමින් සිටින අතර, එය හුදු උපකාරක මෙවලමකට එහා ගිය ChatGPT වැනි සන්නිවේදන අත්දැකීමක් ලබා දෙන බව වාර්තා වේ. දැනට අමෙරිකා එක්සත් ජනපදය තුළ පර්යේෂණාත්මක මට්ටමින් ක්රියාත්මක වන මෙය, ඉදිරියේදී Facebook, Instagram සහ WhatsApp වැනි සේවාවන් ඔස්සේ ගෝලීය වශයෙන් ව්යාප්ත කිරීමට නියමිතය. මෙම යාවත්කාලීන කිරීම හරහා මීට පෙර ස්ටිකර් නිර්මාණයට හෝ කැප්ෂන් ලිවීමට පමණක් සීමා වූ Meta AI, දැන් වඩාත් ස්වභාවික ලෙස සංවාද කළ හැකි, ගොනු කියවිය හැකි සහ කේතකරණ සහාය ලබා දිය හැකි සංවාදශීලී සහායකයෙකු ලෙස දියුණු කර තිබේ.
මෙහි ඇති විශේෂත්වය වන්නේ Muse Spark හරහා උසස් තත්ත්වයේ රූප සහ වීඩියෝ ජනනය කිරීමට ඇති හැකියාවයි. ඉතා සංකීර්ණ කොන්දේසි පවා නිවැරදිව තේරුම් ගනිමින් අන්තර්ගතයන් නිර්මාණය කිරීමට මෙයට හැකි අතර, ෆේස්බුක් හෝ ඉන්ස්ටග්රෑම් තුළ සිදුවන සාකච්ඡා සහ ප්රතිචාර පදනම් කර ගනිමින් පිළිතුරු සැපයීමේ සුවිශේෂී ‘සමාජීය සන්දර්භය’ හඳුනාගැනීමේ හැකියාවක් ද මෙයට හිමිව තිබේ. වෙනම යෙදුමක් ලෙස භාවිත කිරීමට වඩා, දිනපතා භාවිත කරන සමාජ මාධ්ය ජාල තුළම මෙය අන්තර්ගත කර තිබීම පරිශීලකයන්ට විශාල පහසුවක් වනු ඇත.
Meta සමාගමේ මෙම පියවර හරහා ඔවුන් බලාපොරොත්තු වන්නේ හුදෙක් චැට්බොට් වෙළඳපොළේ අංක එක වීම නොව, බිලියන සංඛ්යාත ජනතාවගේ දෛනික සමාජ මාධ්ය භාවිතය තුළට AI තාක්ෂණය සහජයෙන්ම බද්ධ කිරීමයි. මෙමගින් අන්තර්ගතයන් නිර්මාණය කිරීම, තොරතුරු සෙවීම සහ දෛනික සන්නිවේදන කටයුතු වඩාත් කාර්යක්ෂම සහ සරල වනු ඇතැයි අපේක්ෂා කෙරේ.
