ඉරානය සහ ඇමෙරිකාව අතර සාම සාකච්ඡා සඳහා පාකිස්තානය මැදිහත්කරු ලෙස කටයුතු කිරීමට සූදානම්ව සිටින පසුබිමක, පාකිස්තාන ආරක්ෂක අමාත්ය කවාජා අසීෆ් (Khawaja Asif) විසින් ඉස්රායලයට එරෙහිව කළ අතිශය මතභේදාත්මක ප්රකාශයක් හේතුවෙන් විශාල රාජ්යතාන්ත්රික අර්බුදයක් හටගෙන තිබේ. ඔහු විසින් ‘X’ (ට්විටර්) ජාලයේ පළ කරන ලද සටහනකින් ඉස්රායලය “මනුෂ්ය වර්ගයාට ශාපයක් සහ නපුරක්” ලෙස හඳුන්වා දී තිබූ අතර, ඉස්රායලය නිර්මාණය කළ පුද්ගලයන්ට “අපායේ දැවෙන්නට” සිදුවනු ඇති බවට ද ප්රකාශ කර තිබුණි.
ඉරානය සහ ඇමෙරිකාව අතර සටන් විරාමයක් ප්රකාශයට පත් කර තිබුණ ද, ඉස්රායලය දිගින් දිගටම ලෙබනනයට ප්රහාර එල්ල කරන බව පවසමින් ඔහු මෙම විවේචනය එල්ල කර ඇත. “ඉස්ලාමාබාද්හි සාම සාකච්ඡා පැවැත්වෙන අතරතුර ලෙබනනයේ ජන සංහාරයක් සිදුවෙමින් පවතී. ගාසා, ඉරානය සහ දැන් ලෙබනනය යන සෑම තැනකම අහිංසක පුරවැසියන් මරා දමමින් ලේ හැලීම අඛණ්ඩව සිදුවනවා,” යනුවෙන් ඔහු වැඩිදුරටත් සඳහන් කර තිබේ.
මෙම ප්රකාශයට ඉස්රායලයෙන් දැඩි විරෝධයක් එල්ල වූ අතර, ඉස්රායල අගමැති බෙන්ජමින් නෙතන්යාහුගේ කාර්යාලය නිවේදනයක් නිකුත් කරමින් කියා සිටියේ සාමය සඳහා මැදිහත් වන රටක අමාත්යවරයෙකුගෙන් මෙවැනි ප්රකාශයක් කිසිසේත් බලාපොරොත්තු නොවන බවයි. ඉස්රායලය විනාශ කරන ලෙස කළ මෙම ඉල්ලීම කිසිදු රජයකට ඉවසිය නොහැකි එකක් බව ඔවුන් අවධාරණය කළේය. ඉස්රායලයේ මෙම දැඩි ප්රතිචාරයෙන් පසුව ආරක්ෂක අමාත්යවරයා සිය මතභේදාත්මක සටහන ‘X’ ජාලයෙන් ඉවත් කර ගැනීමට පියවර ගෙන ඇති බව වාර්තා වේ.
