ඇමෙරිකානු නීති උල්ලංඝනය කරමින් රුසියාව වෙත අවි ආයුධ සහ උණ්ඩ අලෙවි කිරීමේ ජාලයක් පවත්වාගෙන ගිය ඉතාලියේ ප්රමුඛ පෙළේ ගිනි අවි බෙදා හැරීමේ ආයතනයක විකුණුම් කළමනාකරුවෙකු ඇමෙරිකානු අධිකරණයකදී වරදකරු වී තිබේ. ඉතාලි සමාගම් හරහා ඇමෙරිකානු අපනයන පාලන නීති මඟහැර යමින්, ඇමෙරිකානු ඩොලර් 540,000කට අධික වටිනාකමකින් යුත් උණ්ඩ තොගයක් රුසියාව වෙත ලබා දීමට මොහු කටයුතු කර ඇති බව ඇමෙරිකානු අධිකරණ දෙපාර්තමේන්තුව අනාවරණය කළේය.
ඉතාලියේ ප්රකට ගිනි අවි බෙදාහරින්නෙකුගේ විකුණුම් කළමනාකරුවෙකු වන මැන්ෆ්රඩ් ගෲබර් (Manfred Gruber), පසුගිය මාර්තු 30 වැනිදා නිව්යෝර්ක් නැගෙනහිර දිස්ත්රික් අධිකරණය හමුවේ පෙනී සිටිමින් අපනයන පාලන නීති උල්ලංඝනය කිරීමේ කුමන්ත්රණයට වරදකරු විය. මොහු ඇමෙරිකානු සැපයුම්කරුවන්ගෙන් උණ්ඩ මිලදී ගෙන ඒවා ඉතාලියට ගෙන්වා ගෙන ඇති අතර, එතැන් සිට අපනයන බලපත්ර කොන්දේසි උල්ලංඝනය කරමින් කිර්ගිස්ථානය වෙත යවා ඇත. පසුව එම උණ්ඩ තොගය කිර්ගිස්ථානයේ සිට රුසියාව වෙත යවා ඇති බව විමර්ශනවලදී හෙළි විය.
මෙම ජාවාරමට සම්බන්ධ අනෙක් ප්රධාන පුද්ගලයා වන කිර්ගිස්ථානයේ අවි ජාවාරම්කරුවෙකු වූ සර්ජි සාර්නොව්නිකොව් (Sergei Zharnovnikov), ඇමෙරිකානු නිෂ්පාදිත ගිනි අවි සහ උණ්ඩ රුසියාවට යැවීම හරහා අපනයන පාලන ප්රතිසංස්කරණ පනත උල්ලංඝනය කිරීමේ වරදට පසුගිය ජනවාරි මාසයේදී මාස 39ක සිරදඬුවමකට යටත් කර තිබේ. රුසියානු-යුක්රේන යුද්ධය හේතුවෙන් පනවා ඇති සම්බාධක මඟහැර මෙලෙස අවි සැපයීම ජාත්යන්තර නීති දැඩි ලෙස උල්ලංඝනය කිරීමක් ලෙස ඇමෙරිකානු බලධාරීන් පෙන්වා දෙයි.
