කැලිෆෝනියා ආණ්ඩුකාර ධුරය සඳහා තරඟ වදින ප්රබල ඩිමොක්රටික් අපේක්ෂකයෙකු වන කොන්ග්රස් සභික එරික් ස්වල්වෙල් හට හිටපු කාර්ය මණ්ඩල සේවිකාවක විසින් ලිංගික අපයෝජන සහ දූෂණ චෝදනා එල්ල කර තිබේ. 2019 සහ 2024 වසරවලදී මෙම සිදුවීම් සිදුවූ බවට ඇය චෝදනා කරන නමුත් ස්වල්වෙල් පවසා සිටින්නේ මේවා මැතිවරණය ඉලක්ක කර ගනිමින් තමාට එරෙහිව ගොතන ලද අසත්ය ප්රකාශ බවයි.
මෙම චෝදනා එල්ල වීමත් සමඟ කැලිෆෝනියා දේශපාලන කරළිය දැඩි උණුසුම් මුහුණුවරක් ගෙන ඇත. ඇමරිකානු සෙනෙට් සභික ඇඩම් ෂිෆ් ඇතුළු ප්රබල දේශපාලනඥයින් රැසක් ස්වල්වෙල් වෙත ලබා දුන් සහයෝගය ඉල්ලා අස්කර ගෙන ඇති අතර, ඔහුව මැතිවරණ සටනින් ඉවත් වන ලෙස ද දැනුම් දී තිබේ. කැලිෆෝනියාවේ විශාලතම ගුරු සංගමය ද සිය සහයෝගය අත්හිටුවීමට පියවර ගෙන ඇත.
