පසුගිය වසර තුළ ලොව පුරා අන්තර්ජාල බැංකු ගිණුම් මිලියනයකට අධික සංඛ්යාවක් ‘infostealers’ (තොරතුරු සොරකම් කරන මෘදුකාංග) හරහා අනතුරට ලක්ව ඇති බව Kaspersky ආයතනයේ නවතම වාර්තාවක් අනාවරණය කරයි. මූල්ය සයිබර් අපරාධකරුවන් දැනට භාවිත කරන සාම්ප්රදායික පරිගණක මෘදුකාංගවලින් බැහැරව, පුද්ගලයන්ගේ රහස්ය දත්ත සෘජුවම සොරකම් කිරීම සහ ඒවා නැවත භාවිත කිරීම (Credential theft and data reuse) කෙරෙහි වැඩි අවධානයක් යොමු කර තිබීම මෙයට ප්රධාන හේතුවයි.
විශේෂයෙන්ම ජංගම දුරකථන හරහා සිදුකරන මූල්ය ගනුදෙනු ඉලක්ක කරගනිමින් එල්ල වන සයිබර් ප්රහාර පසුගිය වසරට සාපේක්ෂව 1.5 ගුණයකින් ඉහළ ගොස් ඇත. ‘Phishing’ හෙවත් ව්යාජ වෙබ් අඩවි හරහා දත්ත ලබාගැනීමේ උපක්රමවල ද වෙනසක් දක්නට ලැබෙන අතර, බැංකු වෙබ් අඩවි අනුකරණය කරනවා වෙනුවට ව්යාජ අන්තර්ජාල වෙළඳසැල් (e-shops) නිර්මාණය කර පාරිභෝගිකයන් මුළා කිරීමේ ප්රවණතාව 48.5% දක්වා ඉහළ ගොස් තිබේ.
ආසියා පැසිෆික් (APAC) කලාපය තුළ පරිගණක දත්ත සොරකම් කරන මෘදුකාංග (Infostealers) හඳුනාගැනීම 132% කින් ඉහළ ගොස් ඇති අතර, එමඟින් පරිශීලකයන්ගේ මුරපද (passwords), කුකීස් (cookies), බැංකු කාඩ්පත් අංක සහ ක්රිප්ටෝ පසුම්බිවල රහස්ය තොරතුරු සොරකම් කර ගිණුම්වල පාලනය අත්පත් කර ගැනීමට අපරාධකරුවන් කටයුතු කරයි. ජංගම උපාංග මඟින් බැංකු කටයුතු කිරීමේදී වඩාත් විමසිලිමත් විය යුතු බවත්, අනාරක්ෂිත වෙබ් අඩවිවලට රහස්ය දත්ත ඇතුළත් කිරීමෙන් වැළකිය යුතු බවත් මෙම වාර්තාව වැඩිදුරටත් පෙන්වා දෙයි.
