ඉන්දීය ප්රිමියර් ලීග් (IPL) ඉතිහාසයේ නව පිටුවක් පෙරළමින් 15 හැවිරිදි වෛභව් සූර්යවංශි, වත්මන් ශූර රෝයල් චැලෙන්ජර්ස් බැංගලෝර් (RCB) කණ්ඩායමට එරෙහිව පන්දු 15කින් අර්ධ ශතකයක් රැස් කිරීමට සමත් විය. ගුවහාටි හි පැවැති මෙම තරගයේදී රාජස්ථාන් රෝයල්ස් කණ්ඩායම නියෝජනය කළ සූර්යවංශි, ලකුණු 202ක දැවැන්ත ඉලක්කයක් හඹා යාමේදී පන්දු 26ක් තුළ ලකුණු 78ක් රැස් කරමින් සිය කණ්ඩායමේ ජයග්රහණය තහවුරු කළේය. ඔහුගේ මෙම ප්රහාරාත්මක ඉනිමට හතරේ පහර 8ක් සහ හයේ පහර 7ක් ඇතුළත් විය.
ඕස්ට්රේලියාවේ සුපිරි වේගපන්දු යවන ක්රීඩක ජොෂ් හේසල්වුඩ් සහ ඉන්දියාවේ බුවනේෂ්වර් කුමාර් වැනි ප්රබල පන්දු යවන්නන්ට එරෙහිව බියක් නැතිව ක්රීඩා කළ මෙම යොවුන් ක්රීඩකයා, තෙවන ස්ථානයට පිවිසි දෘව් ජුරෙල් සමඟ එක්ව පන්දු 37කදී ලකුණු 108ක සබඳතාවක් ගොඩනැගීය. මෙය IPL ඉතිහාසයේ වාර්තා වූ තෙවන වේගවත්ම අර්ධ ශතකය ලෙස ඉතිහාසයට එක්වන අතර, මෙවර තරගාවලිය තුළ ඔහු එවැනි දක්ෂතාවක් දැක්වූ දෙවන අවස්ථාව මෙය වීම විශේෂත්වයකි. දැනට තරග හතරකදී ලකුණු 200ක් රැස් කර ඇති ඔහු මෙවර තරගාවලියේ වැඩිම ලකුණු ලාභියා ලෙසද ඉදිරියෙන් පසුවේ.
බැංගලෝර් කණ්ඩායම වෙනුවෙන් රජත් පාටිධර් ලකුණු 63ක් සහ විරාට් කෝලි ලකුණු 32ක් රැස් කරමින් සිය කණ්ඩායම ලකුණු 200 සීමාවෙන් ඔබ්බට රැගෙන ගියද, සූර්යවංශිගේ සහ ජුරෙල්ගේ (නොදැවී 81) ප්රහාරය හමුවේ ඔවුන්ට පරාජය පිළිගැනීමට සිදු විය. රාජස්ථාන් රෝයල්ස් කණ්ඩායම මේ වන විට අපරාජිතව ප්රසාද ලකුණු සටහනේ පෙරමුණේ පසුවන අතර, ලෝක ක්රිකට් විචාරකයින් පවසන්නේ ඉන්දියාවෙන් බිහිවූ මෙම ‘අසිරිමත්’ නවකයා කෙරෙහි මුළු ලෝකයේම අවධානය යොමු වී ඇති බවයි.
