දිවයිනේ ප්රදේශ රැසක පවතින උණුසුම් කාලගුණ තත්ත්වය පිළිබඳව කාලගුණ විද්යා දෙපාර්තමේන්තුව විසින් විශේෂ අවවාදාත්මක නිවේදනයක් නිකුත් කර තිබේ. ස්වභාවික විපත් පිළිබඳ පූර්ව අනතුරු ඇඟවීමේ මධ්යස්ථානය මගින් අද (11) නිකුත් කළ මෙම නිවේදනය හෙට (12) දිනය සඳහා ද වලංගු වේ.
උතුරු, උතුරු-මැද, වයඹ, බස්නාහිර, සබරගමුව, දකුණු, නැගෙනහිර යන පළාත්වල සහ මොනරාගල දිස්ත්රික්කයේ ඇතැම් ස්ථානවල මිනිස් සිරුරට දැනෙන උණුසුම ‘අවධානය යොමු කළ යුතු’ මට්ටමක පවතිනු ඇතැයි අපේක්ෂා කෙරේ. මෙම තත්ත්වය හමුවේ ශරීර සෞඛ්යයට විය හැකි අහිතකර බලපෑම් අවම කර ගැනීමට ජනතාව කටයුතු කළ යුතු බව කාලගුණ විද්යා දෙපාර්තමේන්තුව අවධාරණය කරයි.
අධික උණුසුමෙන් ආරක්ෂා වීම සඳහා ප්රමාණවත් පරිදි ජලය පානය කිරීම, සෙවණ ඇති ස්ථානවල හැකි පමණ විවේක ගැනීම සහ අධික වෙහෙසකාරී කටයුතු සීමා කිරීම අත්යවශ්ය වේ. එසේම, සුදු හෝ ලා පැහැති සැහැල්ලු ඇඳුම් භාවිත කිරීම වඩාත් සුදුසු බව ද උපදෙස් දී ඇත.
විශේෂයෙන් වැඩිහිටියන්, රෝගී පුද්ගලයන් සහ කුඩා දරුවන් පිළිබඳව වැඩි අවධානයක් යොමු කළ යුතු අතර, කුඩා දරුවන් වාහන තුළ තනිකර දමා යාමෙන් වළකින ලෙස ද නිවේදනයේ සඳහන් වේ. කලාපීය වශයෙන් පවතින මෙම තත්ත්වය මැඩපැවැත්වීම සඳහා සෞඛ්ය අංශ ලබා දී ඇති උපදෙස් අකුරටම පිළිපැදීම ඉතා වැදගත් වේ.
