ඇමරිකානු නාවික හමුදාවට අයත් ප්රබල විනාශකාරී යුද නැව් (Destroyers) දෙකක් හෝමුස් සමුද්ර සන්ධිය හරහා යාත්රා කළ බවට ඇමරිකානු මධ්යම විධානය (CENTCOM) විසින් නිකුත් කරන ලද නිවේදනය ඉරානය තරයේ ප්රතික්ෂේප කර තිබේ. ඉරාන සන්නද්ධ බලකායේ ප්රකාශක ඉබ්රාහිම් සොල්ෆගාරි අවධාරණය කර ඇත්තේ ඇමරිකානු යුද නැව් හෝමුස් සමුද්ර සන්ධියට ප්රවේශ වූ බවට පැතිර යන වාර්තා සත්යයෙන් තොර බවයි.
ඇමරිකානු මධ්යම විධානය මීට පෙර ප්රකාශ කර තිබුණේ ‘USS Frank E. Peterson’ සහ ‘USS Michael Murphy’ යන යුද නැව් හෝමුස් සමුද්ර සන්ධිය හරහා ගමන් කරමින් එහි අතුරා ඇති මුහුදු බෝම්බ ඉවත් කිරීමේ මෙහෙයුම් ආරම්භ කළ බවයි. ජනාධිපති ඩොනල්ඩ් ට්රම්ප් ද සිය සමාජ මාධ්ය ගිණුම් ඔස්සේ ප්රකාශ කර තිබුණේ හෝමුස් මුහුදු තීරය පිරිසිදු කිරීමේ කටයුතු ඇමරිකාව විසින් ආරම්භ කර ඇති බවයි.
කෙසේ වෙතත්, ඉරාන හමුදා බලධාරීන් පවසන්නේ අදාළ ඇමරිකානු නෞකා හෝමුස් මුහුදු තීරයට ඇතුළු වීමට උත්සාහ කළ ද, ඉරාන නාවික හමුදාව ලබා දුන් දැඩි අනතුරු ඇඟවීම් හමුවේ ඒවා ආපසු හැරී ගිය බවයි. ඕනෑම නෞකාවක ගමනාගමනය පිළිබඳ තීරණ ගැනීමේ බලය පවතින්නේ ඉරාන ඉස්ලාමීය ජනරජයේ සන්නද්ධ බලකාය සතුව බව ඉරානය යළිත් අවධාරණය කර තිබේ.
පකිස්ථානයේ පැවැති ඇමරිකා – ඉරාන සාම සාකච්ඡා එකඟතාවයකින් තොරව අවසන් වීමත් සමඟ, මෙම හෝමුස් සමුද්ර සන්ධියේ පාලනය පිළිබඳ ගැටලුව කලාපීය යුදමය වාතාවරණයක් දක්වා වර්ධනය වීමේ දැඩි අවදානමක් මතුව ඇත. ගෝලීය තෙල් ප්රවාහනයට අතිශය වැදගත් වන මෙම මුහුදු තීරයේ පවතින උණුසුම්කාරී තත්ත්වය ජාත්යන්තර ප්රජාවගේ දැඩි අවධානයට ලක්ව තිබේ.
