සීදූව – කොටුගොඩ මාර්ගයේ කිලෝමීටර් 03 කණුව ආසන්නයේදී අද (12) උදෑසන සිදු වූ මාරක රිය අනතුරකින් 19 හැවිරිදි තරුණයෙකු අවාසනාවන්ත ලෙස ජීවිතක්ෂයට පත්ව තිබේ. කොටුගොඩ දෙසට ධාවනය වූ යතුරුපැදියක් ඊට ප්රතිවිරුද්ධ දෙසින් පැමිණි ලොරි රථයක මුහුණට මුහුණ ගැටීමෙන් මෙම අනතුර සිදුව ඇති බව වාර්තා වේ. අනතුරින් බරපතළ තුවාල ලැබූ යතුරුපැදිකරු වහාම සීදූව රෝහලට ඇතුළත් කර ඇති අතර, ඒ වන විටත් ඔහු මියගොස් සිට ඇති බව රෝහල් ආරංචි මාර්ග තහවුරු කරයි.
මියගිය තරුණයා මීගොඩ ප්රදේශයේ පදිංචිකරුවෙකු බව හඳුනාගෙන ඇත. අනතුර සම්බන්ධයෙන් ලොරි රථයේ රියදුරු මේ වන විට සීදූව පොලීසිය විසින් අත්අඩංගුවට ගෙන ඇති අතර සිද්ධිය පිළිබඳ වැඩිදුර විමර්ශන ක්රියාත්මක වේ. උත්සව සමයේ මාර්ග තදබදය ඉහළ ගොස් ඇති බැවින් සහ වැසි සහිත කාලගුණය හේතුවෙන් මාර්ග ලිස්සා යාමේ අවදානම පවතින බැවින්, රියදුරන් වඩාත් විමසිලිමත්ව රිය ධාවනය කළ යුතු බව පොලීසිය නැවතත් සිහිපත් කර සිටියි.
