හෙට (අප්රේල් 13) දිනයේදී දිවයිනේ පළාත් රැසක උණුසුම් දර්ශකය මිනිස් සිරුරට දැනෙන “අවධානය යොමු කළ යුතු” මට්ටමක පවතිනු ඇතැයි කාලගුණ විද්යා දෙපාර්තමේන්තුව නිවේදනය කර තිබේ. අද පස්වරුවේ නිකුත් කරන ලද මෙම නිවේදනයට අනුව උතුරු, උතුරු-මැද, වයඹ, බස්නාහිර සහ දකුණු පළාත්වලත්, ත්රිකුණාමලය දිස්ත්රික්කයේ ඇතැම් ප්රදේශවලත් මෙලෙස අධික උණුසුම් තත්ත්වයක් අපේක්ෂා කෙරේ.
උණුසුම් දර්ශකය යනු සාපේක්ෂ ආර්ද්රතාවය සහ සැබෑ උෂ්ණත්වය සැලකිල්ලට ගනිමින් මිනිස් සිරුරට දැනෙන උණුසුම ගණනය කරනු ලබන දර්ශකයකි. මෙම තත්ත්වය යටතේ විජලනය සහ අධික මහන්සිය වැනි සෞඛ්ය ගැටලු ඇති විය හැකි බැවින් මහජනතාව ඒ පිළිබඳව දැඩි අවධානයෙන් පසුවිය යුතු බව එම දෙපාර්තමේන්තුව පෙන්වා දෙයි.
මෙම අධික උණුසුම් කාලගුණයෙන් ආරක්ෂා වීම සඳහා වැඩිපුර ජලය පානය කිරීම, සෙවණ ඇති ස්ථානවල විවේක ගැනීම සහ එළිමහන් වැඩකටයුතුවල නිරත වන විට සෞඛ්යාරක්ෂිත පියවර අනුගමනය කරන ලෙස සෞඛ්ය අංශ ද ජනතාවගෙන් ඉල්ලා සිටියි. විශේෂයෙන් කුඩා දරුවන්, වැඩිහිටියන් සහ රෝගී තත්ත්වයන්ගෙන් පෙළෙන පුද්ගලයන් මේ පිළිබඳව වඩාත් සැලකිලිමත් වීම අත්යවශ්ය වේ.
