ඇමරිකානු ජනාධිපති ඩොනල්ඩ් ට්රම්ප් සහ කතෝලික සභාවේ ශුද්ධෝත්තම 14 වන ලියෝ පාප් වහන්සේ අතර දැඩි වාග් යුද්ධයක් නිර්මාණය වී තිබේ. ට්රම්ප්ගේ විදේශ සහ ආගමන විගමන ප්රතිපත්ති පාප් වහන්සේ විසින් විවේචනය කිරීමට ප්රතිචාර දක්වමින් ජනාධිපතිවරයා සිය ‘Truth Social’ ගිණුම හරහා දීර්ඝ සටහනක් තබමින් පාප් වහන්සේව දැඩි ලෙස විවේචනය කර ඇත.
ලියෝ පාප් වහන්සේ අපරාධ සම්බන්ධයෙන් මෙන්ම විදේශ ප්රතිපත්ති අතින් ඉතා දුර්වල බවත්, ඉරානයට න්යෂ්ටික අවි තිබීම සහ වෙනිසියුලාව සම්බන්ධයෙන් දක්වන මෘදු පිළිවෙත තමන් අනුමත නොකරන බවත් ට්රම්ප් මෙහිදී පවසා සිටියි. පාප් වහන්සේ වාමාංශික දේශපාලනඥයන් පිනවීමට උත්සාහ කරන බවට චෝදනා කරන ට්රම්ප්, උන්වහන්සේ දේශපාලනඥයෙකු නොවී ශ්රේෂ්ඨ පාප් වහන්සේ කෙනෙකු වීමට අවධානය යොමු කළ යුතු බව අවධාරණය කරයි.
තමන් ධවල මන්දිරයේ නොසිටියේ නම් ලියෝ පාප් වහන්සේ වතිකානුවේ නොසිටිනු ඇති බවත්, පල්ලිය උන්වහන්සේව පත් කළේ ඇමරිකානුවෙකු ලෙස ට්රම්ප් පාලනය සමඟ ගනුදෙනු කිරීමට පහසු වනු ඇතැයි සිතා බවත් ජනාධිපතිවරයා තවදුරටත් සඳහන් කරයි. මෙම ප්රකාශය හරහා ජනාධිපති ට්රම්ප් තවදුරටත් කියා සිටියේ ලියෝ පාප් වහන්සේට වඩා උන්වහන්සේගේ සහෝදරයා වන ලුවී (Louis) හට තමන් කැමති බවයි. එයට හේතුව ලෙස ඔහු දක්වන්නේ ලුවී සම්පූර්ණයෙන්ම MAGA (Make America Great Again) පාර්ශවයේ අයෙකු වීමයි. මෙම දැඩි ප්රකාශයත් සමඟ වතිකානය සහ ඇමරිකානු පාලනය අතර රාජ්යතාන්ත්රික සබඳතා දැඩි අර්බුදයකට ලක්ව ඇති බව විදෙස් මාධ්ය වාර්තා කරයි.
