පාස්කු ප්රහාරයේ මහ මොළකරුවන් සම්බන්ධයෙන් විවිධ පාර්ශ්ව සහ පූජ්ය ගලගොඩඅත්තේ ඥාණසාර හිමියන් මෑතකාලීනව සිදුකළ ප්රකාශ, එල්ල වන චෝදනාවලින් ගැලවීමේ උත්සාහයක් බව මහජන ආරක්ෂක අමාත්ය ආනන්ද විජේපාල මහතා පවසයි. රජය පුද්ගලික මත මත නොව විද්යාත්මක සාක්ෂි මත පදනම්ව විමර්ශන සිදුකරන බව අමාත්යවරයා අවධාරණය කළේය.
පිටු 37,500කින් සහ වෙළුම් 87කින් සමන්විත විනිසුරු ජනක් ද සිල්වා මහතාගේ විමර්ශන වාර්තාව පසුගිය රජයන් විසින් දීර්ඝ කාලයක් සඟවා තබා තිබූ බවත්, වර්තමාන ජනාධිපතිවරයා එම වාර්තාව අධ්යයනය කිරීමට විශේෂ කණ්ඩායම් 10ක් පත් කර ඇති බවත් ඔහු සඳහන් කළේය. එම වාර්තාවේ නිර්දේශ මත නඩු පැවරීම සඳහා නීතිපති දෙපාර්තමේන්තුවට යොමු කිරීමට කටයුතු සූදානම් කර ඇති අතර, කුමන්ත්රණයට සම්බන්ධ තොරතුරු ඉදිරියේදී හෙළිවන බව ද අමාත්යවරයා පැවසීය.
මීට අමතරව, උත්සව සමයේ ආරක්ෂාව සඳහා පොලීසිය සහ යුද හමුදාව එක්ව විශේෂ වැඩපිළිවෙළක් අප්රේල් 18 දක්වා ක්රියාත්මක කරන බවත්, බන්ධනාගාර අක්රමිකතා මැඩපැවැත්වීම සඳහා විශේෂ වැටලීම් සිදුකරන බවත් ඔහු වැඩිදුරටත් ප්රකාශ කළේය.
