එලොන් මස්ක්ගේ SpaceX සමාගම 2025 වසරේදී ඇමෙරිකානු ඩොලර් බිලියන 18.5කට අධික ආදායමක් උපයා තිබියදීත්, සමස්තයක් ලෙස ඩොලර් බිලියන 5ක පමණ පාඩුවක් වාර්තා කර ඇති බව නවතම මූල්ය දත්ත හෙළි කරයි. මෙලෙස සමාගම පාඩු ලැබීමට ප්රධානතම හේතුව වී ඇත්තේ පසුගිය පෙබරවාරි මාසයේදී SpaceX විසින් අත්පත් කරගත් xAI සමාගමේ කෘත්රිම බුද්ධි (AI) යටිතල පහසුකම් වෙනුවෙන් සිදු කරන ලද අතිවිශාල ප්රාග්ධන ආයෝජනයන්ය.
විශේෂයෙන්ම xAI සමාගම විසින් අධි-කාර්යසාධන චිප්ස් (High-performance chips) මිලදී ගැනීම සහ දත්ත මධ්යස්ථාන ඉදිකිරීම සඳහා සිදු කරන දැවැන්ත වියදම් SpaceX හි ඒකාබද්ධ මූල්ය වාර්තාවලට ඇතුළත් වීම මීට බලපා තිබේ. 2024 වසරේදී ඩොලර් බිලියන 8ක පමණ ලාභයක් ලැබූ SpaceX සමාගම, මෙම AI ව්යාපෘති ඒකාබද්ධ කිරීමත් සමඟ කෙටි කාලීන පාඩු ලබන මට්ටමකට පත්ව ඇත.
මෙම මූල්ය වාර්තා නිකුත් වන්නේ SpaceX සමාගම ලෝක ඉතිහාසයේ විශාලතම කොටස් වෙළඳපොළ ලැයිස්තුගත කිරීමකට (IPO) සූදානම් වන පසුබිමකය. ඩොලර් ට්රිලියන 1.75ක ඉලක්කගත අගයක් සහිතව මෙම ක්රියාවලිය සැලසුම් කර ඇති අතර, ආයෝජකයන් මෙම AI ආයෝජන මඟින් අනාගතයේදී ලාභ ලබන ආකාරය පිළිබඳව විස්තරාත්මක පැහැදිලි කිරීම් බලාපොරොත්තුවෙන් සිටිති. කෘත්රිම බුද්ධිය, රොකට් තාක්ෂණය සහ චන්ද්රිකා අන්තර්ජාලය යන සියල්ල ඒකාබද්ධ කරමින් “සිරස් අතට ඒකාබද්ධ වූ නවෝත්පාදන වේදිකාවක්” (Vertically integrated innovation platform) නිර්මාණය කිරීම මස්ක්ගේ දිගුකාලීන අරමුණ වී තිබේ.
