ඉරාන යුද්ධය සම්බන්ධයෙන් නිශ්චිත පාර්ශවයක් තෝරාගන්නා ලෙස ඇමෙරිකාවෙන් එල්ල වන දැඩි බලපෑම් හමුවේ, සෞදි අරාබිය සිය ස්වාධීනත්වය ප්රකාශ කරමින් සෘජු සහ නිර්භීත පිළිතුරක් ලබා දී තිබේ. සෞදි විදේශ අමාත්ය ෆයිසාල් බින් ෆර්හාන් (Prince Faisal bin Farhan) කුමරු අවධාරණය කළේ සෞදි අරාබිය ඇතුළු කිසිදු අරාබි රටක් සෙසු රටවල අවශ්යතාවයන් මත තම විදේශ ප්රතිපත්ති සකස් නොකරන බවයි.
සෞදි අරාබිය සහ සියලුම අරාබි රටවල් තමන්ගේ ප්රතිපත්ති සකස් කරන්නේ අන් අයගේ අභිලාෂයන් මත නොව, තමන්ගේම ජාතික අවශ්යතාවයන් මත බවත්, ඇමෙරිකාව හෝ වෙනත් ඕනෑම බලවතෙකුගේ අදහස් කෙසේ වුවද තම රටේ සහ කලාපයේ ස්ථාවරත්වයට වඩාත් හිතකර තීරණ ගැනීමට සෞදි අරාබිය පසුබට නොවන බවත් ඔහු පෙන්වා දුන්නේය. ඉරාන වරායන් අවහිර කිරීම සහ නාවික බලපෑම් එල්ල කිරීම වෙනුවට රාජ්යතාන්ත්රික මට්ටමින් සටන් විරාමයක් ඇති කර ගැනීම කලාපයේ පොදු අවශ්යතාව බව සෞදි අරාබියේ ස්ථාවරය වී තිබේ.
මැදපෙරදිග කලාපය තුළ ඇමෙරිකාවේ ප්රබලතම මිත්රයෙකු ලෙස සැලකෙන සෞදි අරාබිය, වත්මන් ඉරාන අර්බුදයේදී ඇමෙරිකාවේ “සම්පූර්ණ සහාය ලබා ගැනීමේ” උපායමාර්ගයට එකඟ නොවීම කැපී පෙනෙන සිදුවීමකි. විශේෂයෙන්ම තම ගුවන් සීමාව ඉරානයට එරෙහි ප්රහාර සඳහා භාවිතා කිරීමට ඉඩ නොදෙන බව සෞදි අරාබිය මීට පෙරද අවධාරණය කර තිබුණි. මෙම ප්රකාශය හරහා අරාබි ලෝකය දැන් ලෝක බලවතුන්ගේ අණසකට යටත් නොවී, සිය කලාපීය බලය තහවුරු කිරීමට උත්සාහ කරන බව දේශපාලන විචාරකයෝ පවසති.
තොරතුරු උපුටා ගැනීම: ndtv ඇසුරින්
