ඉරාන යුද්ධය අවසන් කිරීම සඳහා වන සාම සාකච්ඡා යළි ආරම්භ වීමේ සුබවාදී බලාපොරොත්තු මධ්යයේ වුවද, අමෙරිකානු හමුදාව විසින් ඉරානයේ මුහුදු මාර්ගික වෙළඳාම සහමුලින්ම අත්හිටුවීමට පියවර ගෙන තිබේ. අමෙරිකානු මධ්යම විධානයේ ප්රධානී අද්මිරාල් බ්රැඩ් කූපර් සඳහන් කරන පරිදි, ඉරාන ආර්ථිකයෙන් 90%කට පදනම වන මුහුදු මාර්ගික ආර්ථික වෙළඳාම, නාවික අවහිරතාව පනවා පැය 36ක් වැනි කෙටි කාලයක් තුළ සම්පූර්ණයෙන්ම නතර කිරීමට අමෙරිකානු බලකායන් සමත්ව ඇත. පසුගිය සඳුදා සිට ක්රියාත්මක මෙම අවහිරතාවය යටතේ ඉරානයට සම්බන්ධ තෙල් නැව් අටක් (08) අමෙරිකානු හමුදා භාරයට ගෙන ඇති බවද වාර්තා වේ.
මෙවැනි දැඩි ආර්ථික පීඩනයක් මධ්යයේ වුවද, ජනාධිපති ඩොනල්ඩ් ට්රම්ප් පවසන්නේ ඉදිරි දින දෙක ඇතුළත පකිස්ථානයේදී ඉරානය සමඟ සාම සාකච්ඡා යළි ආරම්භ විය හැකි බවයි. අප්රේල් 21 වනදා අවසන් වන සති දෙකක සටන් විරාමය දීර්ඝ කිරීමේ අවශ්යතාවක් නැති බවත්, රාජ්ය තාන්ත්රික එකඟතාවයකට පැමිණීමට තමා වඩාත් කැමති බවත් ඔහු ABC පුවත් සේවයට පවසා තිබේ. කෙසේ වෙතත්, ඉරානයේ පරමාණුක වැඩසටහන අත්හිටුවිය යුතු කාලසීමාව සහ පනවා ඇති සම්බාධක ඉවත් කිරීමේ කොන්දේසි සම්බන්ධයෙන් දෙපාර්ශ්වය අතර තවමත් එකඟතාවයක් ඇති වී නොමැත.
පෙබරවාරි 28 වැනිදා ආරම්භ වූ මෙම යුද්ධය හේතුවෙන් මේ වන විට පුද්ගලයින් 5,000කට අධික පිරිසක් මියගොස් ඇති අතර, ගෝලීය බලශක්ති සැපයුමට අතිශය වැදගත් වන හෝමුස් සමුද්ර සන්ධිය වැසී යාම නිසා ලෝක ආර්ථිකයට ද දැඩි බලපෑම් එල්ල වී තිබේ. සාම සාකච්ඡා පිළිබඳ පුවත් ලැබීමත් සමඟ ගෝලීය තෙල් මිල මඳක් පහත බැස ඇති අතර, කැනඩාව, බ්රිතාන්යය සහ ජපානය ඇතුළු රටවල් ලෙබනනයේ සාම සාධක හමුදා සාමාජිකයින් ඝාතනය කිරීම හෙළා දකිමින් යුද්ධය වහාම නතර කරන ලෙස ඉල්ලා සිටියි.
