ආර්ජන්ටිනාවේ බුවනෝස් අයර්ස් නුවර ප්රධාන උද්යාන තුළ සැබෑ සතුන්ගේ මුහුණු ආවරණ සහ වලිග පැළඳගෙන, හතරගාතෙන් දුවන යොවුන් වියේ දරුවන්ගේ අසාමාන්ය දසුන් මේ වන විට එරට සමාජය තුළ දැඩි කතාබහට ලක්ව තිබේ. ‘තීරියන්’ (Therian) ලෙස හැඳින්වෙන මෙම පිරිස විශ්වාස කරන්නේ තමන් මානසිකව හෝ අධ්යාත්මිකව සතුන් ලෙස උපත ලබා මිනිස් සිරුරක් තුළ සිරවී සිටින පිරිසක් බවයි. ටික්ටොක් (TikTok) ජාලය හරහා වීඩියෝ මිලියන දෙකකට අධික ප්රමාණයක් පළ කරමින් ලොව පුරා ප්රචලිත වූ මෙම රැල්ල, හුදු විනෝදාංශයකින් ඔබ්බට ගිය ගැඹුරු සත්ත්ව අනන්යතාවයක් කරා යොමු වූවකි.
මෙම රැල්ලේ කැපී පෙනෙන චරිතයක් වන පහළොස් හැවිරිදි අගුවාරා, තමා බෙල්ජියම් මැලිනොයිස් වර්ගයේ සුනඛයෙකු ලෙස හඳුන්වා ගනිමින් සිය වයස පවා ‘සුනඛ වර්ෂ’ වලින් ගණනය කිරීමට පෙළඹී සිටින්නීය. ලක්ෂයකට අධික අනුගාමිකයින් පිරිසක් සිටින ඇය වැනි තරුණ තරුණියන්, මෙම සත්ත්ව අනන්යතාවය සිය හැඟීම් ප්රකාශ කිරීමට සහ සමාන අදහස් ඇති පිරිස් සමඟ බැඳීම් ගොඩනඟා ගැනීමට යොදාගන්නා මාධ්යයක් ලෙස හඳුන්වති. කෙසේ වෙතත්, මෙම අසාමාන්ය හැසිරීම් රටාව යොවුන් පරපුරේ මානසික වර්ධනය කෙරෙහි කවරාකාරයේ බලපෑමක් ඇති කරනු ලැබේද යන්න පිළිබඳව විද්වතුන් සහ දෙමාපියන් අතර පවතින්නේ දැඩි අවිනිශ්චිතතාවයකි.
