මැදපෙරදිග කලාපයේ පවතින යුදමය වාතාවරණය හේතුවෙන් බලශක්ති ක්ෂේත්රයේ යටිතල පහසුකම්වලට ඇමෙරිකානු ඩොලර් බිලියන 34ත් 58ත් අතර දැවැන්ත හානියක් සිදුව ඇති බව ‘රයිස්ටෑඩ් එනර්ජි’ (Rystad Energy) සහ CNBC පුවත් සේවය වාර්තා කරයි. මේ වන විට බලශක්ති මධ්යස්ථාන 80කට අධික සංඛ්යාවකට ප්රහාර එල්ල වී ඇති අතර, ඉන් තුනෙන් එකකට වඩා වැඩි ප්රමාණයකට බරපතල හානි සිදුව තිබේ.
මෙම යුද්ධයෙන් වැඩිම පීඩාවකට පත්ව ඇත්තේ ඉරානයයි. එරට බලශක්ති පද්ධතියට සිදුව ඇති හානිය ඩොලර් බිලියන 19ක් පමණ වන බව ගණන් බලා ඇත. එසේම, කටාර් රාජ්යයේ දැවැන්ත ද්රව ස්වාභාවික වායු (LNG) මධ්යස්ථාන වෙත එල්ල වූ ප්රහාර හේතුවෙන් අහිමි වූ ආදායම පමණක් ඩොලර් බිලියන 20ක් පමණ වේ. මෙම හානි යථා තත්ත්වයට පත් කිරීම සඳහා වසර 5ක පමණ කාලයක් ගතවනු ඇතැයි විද්වතුන් පෙන්වා දෙයි.
මෙම දැවැන්ත විනාශය හේතුවෙන් කලාපීය බලශක්ති සැපයුම අඩාල වී ඇති අතර, එය ලෝක වෙළඳපොළේ තෙල් සහ ගෑස් මිල ඉහළ යාමට සෘජුවම බලපා ඇත. යුද්ධය අවසන් වුවද, මෙම යටිතල පහසුකම් යළි ගොඩනැගීම සඳහා වැයවන අතිවිශාල පිරිවැය සහ කාලය ඉදිරි වසර කිහිපය තුළ ලෝක ආර්ථිකයට දැඩි බලපෑමක් එල්ල කරනු ඇතැයි ආර්ථික විචාරකයෝ අනතුරු අඟවති. ජනාධිපති ට්රම්ප් සහ භාණ්ඩාගාර ලේකම් බෙස්න්ට් විසින් පෙට්රල් මිල පහත වැටෙනු ඇති බවට කරන සුබවාදී ප්රකාශ හමුවේ වුවද, මෙම යටිතල පහසුකම් යථා තත්ත්වයට පත් කිරීමේ අභියෝගය රජයන් හමුවේ පවතිනු ඇත.
තොරතුරු උපුටා ගැනීම: Rystad Energy සහ CNBC ඇසුරින්
