පසුගිය වසරේ නොවැම්බර් මාසයේදී හොංකොං හි තායි පෝ (Tai Po) දිස්ත්රික්කයේ මහල් නිවාස සංකීර්ණයක ඇති වූ මාරාන්තික ගින්නෙන් අවතැන් වූ වැඩිහිටියන්ට, සිය විනාශ වූ නිවෙස්වල ඉතිරිව ඇති බඩුබාහිරාදිය රැගෙන ඒම සඳහා රොබෝ තාක්ෂණයෙන් ක්රියා කරන කෘතිම පාද (Robotic Exoskeletons) ආධාර වෙමින් පවතී. පුද්ගලයන් 168 දෙනෙකුට මරු කැඳවූ මෙම බිහිසුණු ගින්නෙන් පසු, තමන් වසර 30 කට අධික කාලයක් පදිංචිව සිටි නිවාසවලට ප්රථම වරට පිවිසීමට අවස්ථාව හිමිව ඇත්තේ එළඹෙන අප්රේල් 20 සිට මැයි 04 දක්වා කාලය තුළදීය.
ගින්නෙන් විදුලි සෝපාන පද්ධති (Lifts) විනාශ වී ඇති බැවින්, 13 වැනි සහ 15 වැනි මහල් වැනි ඉහළ මාලයන් වෙත පඩිපෙළ දිගේ ගමන් කිරීම වයස්ගත පුද්ගලයන්ට විශාල අභියෝගයක් වී තිබේ. මේ සඳහා “AidVengers Federation” නම් රාජ්ය නොවන සංවිධානය මැදිහත් වී, චීනයේ නිෂ්පාදිත “Hypershell” රොබෝ පාද ආධාරක මොවුන්ට ලබා දී ඇත. 59 හැවිරිදි ෆැනී මොක් වැනි වැසියන් පවසන්නේ දණහිස් අමාරුව සහ හුස්ම ගැනීමේ අපහසුව නිසා මෙම රොබෝ තාක්ෂණය තමන්ට මහත් අස්වැසිල්ලක් බවයි. එක් පවුලකට සිය බඩුබාහිරාදිය එකතු කර ගැනීමට හිමිවන්නේ පැය තුනක කාලයක් පමණක් වන අතර, දශක ගණනාවක් තිස්සේ පරිහරණය කළ මතකයන් රැගත් ඡායාරූප ඇල්බම සහ වටිනා දෑ මෙම කෙටි කාලය තුළ රැගෙන ඒම දැඩි දුෂ්කර කාර්යයක් බව ද ඔවුහු පවසති.
