දකුණු කොරියානු කොටස් වෙළෙඳපොළේ (Korea Exchange) පවතින දුර්වල සමාගම් ඉවත් කර වෙළෙඳපොළේ ගුණාත්මකභාවය ඉහළ නැංවීම සඳහා ලැයිස්තුගත කිරීම් අවලංගු කිරීමේ (Delisting) නීති ලබන ජූලි 1 වැනිදා සිට දැඩි කිරීමට තීරණය කර ඇත. විශේෂයෙන්ම ඉතා අඩු මිලට අලෙවි වන කොටස් (Penny stocks) ඉලක්ක කර ගනිමින් මෙම නව නිර්ණායක හඳුන්වා දී තිබේ.
ලබන ජූලි 1 වැනිදා සිට KOSPI දර්ශකයේ සමාගමක වෙළෙඳපොළ වටිනාකම වොන් බිලියන 30 ට වඩා අඩුවෙන් හෝ KOSDAQ දර්ශකයේ වොන් බිලියන 20 ට වඩා අඩුවෙන් පවතී නම්, එම සමාගම් කොටස් වෙළෙඳපොළෙන් ඉවත් කිරීමේ ක්රියාවලිය ආරම්භ වේ. 2027 ජනවාරි 1 සිට මෙම සීමාවන් පිළිවෙළින් වොන් බිලියන 50 සහ 30 දක්වා තවදුරටත් ඉහළ නංවනු ඇත.
යම් සමාගමක කොටසක මිල පිට පිට දින 30ක් පුරා වොන් 500 ට වඩා අඩුවෙන් පවතී නම්, එම සමාගම ලැයිස්තුගත කිරීම්වලින් ඉවත් කිරීමට නව නිර්ණායකයක් එක් කර ඇත. මෙවැනි අඩු මිලැති කොටස් භාවිත කරමින් සිදුකරන අසාධාරණ වෙළෙඳ ගනුදෙනු සහ මිල හැසිරවීම් වැළැක්වීම මෙහි අරමුණයි.
මීට පෙර සමාගමක ප්රාග්ධනය ක්ෂය වීම පිළිබඳව තීරණය කරනු ලැබුවේ වසර අවසාන වාර්තා මත පදනම්වය. එහෙත් නව නීති අනුව, අර්ධ වාර්ෂික වාර්තාවකින් සම්පූර්ණ ප්රාග්ධන ක්ෂය වීමක් (Capital Impairment) තහවුරු වුවහොත් වහාම ඉවත් කිරීමේ පියවර ගනු ලැබේ. එමෙන්ම තොරතුරු නිවැරදිව අනාවරණය නොකරන සමාගම්වලට එරෙහිව ද දැඩි දඬුවම් පැනවීමට නියමිතය.
මෙම පියවර හරහා කොටස් වෙළෙඳපොළේ පවතින “සොම්බි සමාගම්” (Zombie companies) ඉවත් කර ආයෝජකයන්ට සිදුවන හානිය අවම කිරීමට කොරියානු බලධාරීන් අපේක්ෂා කරයි. මේ සම්බන්ධයෙන් අප්රේල් 24 දක්වා අදහස් විමසීම සිදු කෙරෙන අතර මැයි මාසයේදී මූල්ය සේවා කොමිසමේ අනුමැතිය ලැබීමෙන් පසු ජූලි මාසයේදී මෙම නීති බලාත්මක වේ.
