රුමේනියාවේ පාලක සන්ධානය නියෝජනය කරන ප්රධාන පක්ෂ අතර දැඩි මතභේද හටගෙන තිබුණද, රටේ ස්ථාවරත්වය වෙනුවෙන් මෙම සන්ධානය අඛණ්ඩව පවත්වාගෙන යාම හැර වෙනත් විකල්පයක් නැති බව රුමේනියානු ජනාධිපති නිකුසෝර් ඩාන් (Nicusor Dan) අවධාරණය කරයි.
සන්ධානයේ විශාලතම පක්ෂය වන වාමාංශික සමාජ ප්රජාතන්ත්රවාදී පක්ෂය (PSD), ප්රතිසංස්කරණවාදී ලිබරල් අගමැති ඉලී බොලොජන් (Ilie Bolojan) හට ලබා දෙන සහයෝගය ඉල්ලා අස්කර ගැනීමට එළඹෙන සඳුදා ඡන්දය ප්රකාශ කිරීමට නියමිතය. රජයේ වියදම් කපා හැරීම සම්බන්ධයෙන් ඇති වූ ගැටුම් මෙයට ප්රධානතම හේතුව වී ඇත.
අගමැති බොලොජන් මහතා තමා ධුරයෙන් ඉල්ලා අස් නොවන බව ප්රකාශ කර ඇති අතර, මෙය රට තුළ දේශපාලන අස්ථාවරත්වයක් ඇති වීමට හේතු විය හැකි බව විචාරකයෝ පවසති. මීට මාස 10කට පෙර පිහිටුවූ මෙම සන්ධානයේ එකඟතාව වූයේ 2027 වසන්ත සමය වන තෙක් බොලොජන් මහතා අගමැති ධුරය දැරිය යුතු බවයි.
රුසියානු මැදිහත්වීම් සහ දැඩි දක්ෂිණාංශික බලපෑම් හමුවේ පසුගිය මැයි මාසයේ පැවැති ජනාධිපතිවරණයෙන් නිකුසෝර් ඩාන් මහතා ජයග්රහණය කළේය. වත්මන් රජය සමන්විත වන්නේ යුරෝපා සංගමයට හිතවාදී පක්ෂ හතරක එකතුවෙනි.
රට පාලනය කිරීම සඳහා මෙම පක්ෂ හතරේ එකතුවෙන් සැදුම්ලත් සන්ධානයක් පැවතීම අනිවාර්ය බවත්, වෙනත් කිසිදු විකල්පයක් රුමේනියාව සතුව නොමැති බවත් ජනාධිපතිවරයා බ්රහස්පතින්දා රාත්රියේ ප්රාදේශීය ගුවන් විදුලි නාලිකාවකට පවසා තිබේ.
