2026 වසරේ ලෝක බැංකු සහ ජාත්යන්තර මූල්ය අරමුදලේ (IMF) වසන්ත හමුව (Spring Meeting) අතරතුර ශ්රී ලංකා මහ බැංකු අධිපති ආචාර්ය නන්දලාල් වීරසිංහ මහතා ඇතුළු දූත පිරිස ජාත්යන්තර මූල්ය ආයතන, ආයෝජකයින් සහ ශ්රේණිගත කිරීමේ ආයතන සමඟ සාර්ථක සාකච්ඡා වට කිහිපයක් පවත්වා තිබේ.
විස්තීරණ අරමුදල් පහසුකම යටතේ ඒකාබද්ධ පස්වන සහ හයවන සමාලෝචන සඳහා කාර්ය මණ්ඩල මට්ටමේ ගිවිසුමකට එළඹීම පිළිබඳව IMF කළමනාකාර අධ්යක්ෂිකා ආචාර්ය ක්රිස්ටලිනා ජෝර්ජියේවා මහත්මිය ශ්රී ලංකාවට සිය සුබ පැතුම් පිරිනමා ඇත. ශ්රී ලංකාවේ ආර්ථික ප්රකෘතිය උදෙසා IMF හි අඛණ්ඩ සහයෝගය ඇය මෙහිදී යළි තහවුරු කළාය.
ගෝලීය බාධක සහ දේශීය අභියෝග මධ්යයේ ශ්රී ලංකා බලධාරීන් ලබා ඇති ප්රගතිය IMF හි නියෝජ්ය කළමනාකාර අධ්යක්ෂ ආචාර්ය කෙන්ජි ඔකමුරා මහතාගේ ඇගයීමට ලක්විය. මැදපෙරදිග ගැටුම් හමුවේ මූල්ය ආධාර පියවර නිසි පරිදි ඉලක්ක ගත විය යුතු බවත්, පිරිවැය පිළිබිඹු කරන බලශක්ති මිලකරණය පවත්වා ගැනීමේ වැදගත්කමත් ඔහු පෙන්වා දුන්නේය.
මෑතකදී බලපෑ සුළි කුණාටු තත්ත්වය සහ භූ දේශපාලනික වෙනස්වීම් හමුවේ වැඩසටහන් පරාමිතීන් තුළ IMF ආයතනය දැක්වූ නම්යශීලීභාවය පිළිබඳව මහ බැංකු අධිපතිවරයා සිය කෘතඥතාව පළ කළේය.
ආර්ථික ඔරොත්තු දීමේ හැකියාව ශක්තිමත් කර දිගුකාලීන වර්ධනයක් අත්පත් කර ගැනීම සඳහා දැනට ක්රියාත්මක ප්රතිසංස්කරණ සහ ප්රතිපත්ති විනය අඛණ්ඩව පවත්වාගෙන යාමට ශ්රී ලංකාව මෙහිදී දිරිමත් කෙරිණි.
