අමෙරිකානු නාවික හමුදාව විසින් පනවා ඇති නාවික අවහිර කිරීම් නොතකා ගමන් කිරීමට උත්සාහ කළ ‘Touska’ නම් ඉරාන ධජය සහිත දැවැන්ත භාණ්ඩ ප්රවාහන නෞකාව ප්රහාරයකින් පසු සිය භාරයට ගත් බව ජනාධිපති ඩොනල්ඩ් ට්රම්ප් නිල වශයෙන් නිවේදනය කළේය. සිය ‘Truth Social’ ගිණුමේ සටහනක් තබමින් ජනාධිපතිවරයා කියා සිටියේ, අඩි 900ක් පමණ දිගැති මෙම නෞකාව නතර කරන ලෙස දුන් අනතුරු ඇඟවීම් නොසලකා හැරීම හේතුවෙන් අමෙරිකානු නාවික හමුදාව එහි එන්ජින් කාමරයට වෙඩි තබා නෞකාව අඩපණ කළ බවයි. නීති විරෝධී ක්රියාවන් සම්බන්ධයෙන් අතීතයේදී ද සම්බාධකවලට ලක්ව තිබූ මෙම නෞකාව මේ වන විට අමෙරිකානු භාරයේ පවතින අතර එහි අඩංගු දෑ පිළිබඳව පරීක්ෂණ පවත්වමින් පවතී.
මෙම ක්රියාව ‘සන්නද්ධ මංකොල්ලකෑමක්’ ලෙස හඳුන්වමින් ඉරානය එය දැඩි ලෙස හෙළා දැක ඇති අතර මීට එරෙහිව නුදුරේදීම ප්රතිප්රහාර එල්ල කරන බවට අනතුරු අඟවා තිබේ. ඉරාන හමුදා ප්රකාශකයෙකු සඳහන් කළේ අමෙරිකාව සටන් විරාම ගිවිසුම උල්ලංඝනය කරමින් සිය වාණිජ නෞකාවකට ප්රහාර එල්ල කර ඇති බවයි. මෙම තත්ත්වයත් සමඟ ඉරාන විප්ලවවාදී ආරක්ෂක හමුදාව (IRGC) හෝර්මුස් සමුද්ර සන්ධිය යළිත් වසා දැමීමට පියවර ගෙන ඇති අතර, අමෙරිකානු නාවික අවහිර කිරීම් පවතින තාක් කල් කිසිදු සාම සාකච්ඡාවකට සහභාගී නොවන බව ඉරාන රාජ්ය මාධ්ය අවධාරණය කරයි.
පකිස්ථානයේ ඉස්ලාමාබාද් නුවරදී පැවැත්වීමට නියමිත දෙවන වටයේ සාම සාකච්ඡා සඳහා අමෙරිකානු උප ජනාධිපති ජේ.ඩී. වෑන්ස් ඇතුළු පිරිසක් පැමිණීමට සූදානම්ව සිටියද, වර්තමාන උණුසුම් වාතාවරණය හමුවේ එම සාකච්ඡා දැඩි අවදානමකට ලක්ව ඇත. එළඹෙන බදාදා දිනෙන් අවසන් වීමට නියමිත දෙරට අතර පවතින තාවකාලික සටන් විරාමය තවදුරටත් දීර්ඝ කර ගැනීම පිළිබඳව මේ වන විට දැඩි අවිශ්වාසයක් මතුව තිබේ. ජනාධිපති ට්රම්ප් පවසන්නේ ඉරානය සමඟ සාම ගිවිසුමකට එළඹෙන තෙක් නාවික අවහිර කිරීම් දිගටම ක්රියාත්මක කරන බවත්, ඉරානය එකඟ නොවන්නේ නම් එරට ප්රධාන යටිතල පහසුකම් විනාශ කිරීමට පියවර ගන්නා බවත්ය.
