ඉශ්රායලය සහ යුරෝපා සංගමය අතර පවතින සබඳතා පාලනය කෙරෙන විශේෂ ගිවිසුම (Association Agreement) අත්හිටුවිය යුතු බවට ස්පාඤ්ඤය සහ අයර්ලන්තය ඇතුළු රටවල් කිහිපයක් ඊයේ (අඟහරුවාදා) දැඩි ඉල්ලීමක් කළද, යුරෝපා සංගමයේ අනෙකුත් සාමාජික රටවලින් ඊට ප්රමාණවත් සහයෝගයක් හිමි නොවීය. ලක්සම්බර්ග්හි පැවති යුරෝපා සංගමයේ විදේශ අමාත්යවරුන්ගේ හමුවකදී මෙම යෝජනාව ඉදිරිපත් වූ අතර බටහිර ඉවුරේ ඉශ්රායල පදිංචිකිරීම් ව්යාප්ත කිරීම, ගාසා තීරයේ පවතින මානුෂීය අර්බුදය සහ ඉශ්රායලය හඳුන්වා දී ඇති නව මරණ දඬුවම් නීතිය පිළිබඳව මෙහිදී අවධානය යොමු කෙරිණි.
ස්පාඤ්ඤ විදේශ අමාත්ය ජෝසේ මැනුවෙල් අල්බරේස් (Jose Manuel Albares) මාධ්ය වෙත අදහස් දක්වමින් පැවසුවේ අද වන විට යුරෝපයේ විශ්වසනීයත්වය අනතුරේ වැටී ඇති බවත්, 2000 වසරේ සිට ක්රියාත්මක වන මෙම ද්විපාර්ශ්වික ගිවිසුම අත්හිටුවීම පිළිබඳව වහාම සාකච්ඡා කළ යුතු බවත්ය. කෙසේ වෙතත් ඉශ්රායලය සම්බන්ධයෙන් යුරෝපා සංගමයේ සාමාජික රටවල් දරන විවිධ ස්ථාවරයන් හේතුවෙන් මෙම යෝජනාව සම්මත කර ගැනීමට නොහැකි වී තිබේ. සාකච්ඡාවෙන් අනතුරුව අදහස් දැක්වූ යුරෝපා සංගමයේ විදේශ ප්රතිපත්ති ප්රධානී කාජා කලාස් (Kaja Kallas) සඳහන් කළේ ගිවිසුම අත්හිටුවීමට තරම් ප්රමාණවත් සහයෝගයක් සාමාජික රටවලින් හිමි නොවූවත්, ඉශ්රායලය සමඟ පවතින සබඳතාවයේ ස්වභාවය පිළිබඳව ඉදිරියේදීත් සාකච්ඡා පවත්වන බවයි.
