2025 වසර සඳහා ඉතාලියේ දළ දේශීය නිෂ්පාදිතයට (GDP) සාපේක්ෂව අයවැය හිඟය 3.1% ක් ලෙස පැවති බව එරට සංඛ්යාලේඛන කාර්යාංශය (ISTAT) අද (22) තහවුරු කළේය. යුරෝපා සංගමය විසින් පනවා ඇති 3% ක අයවැය හිඟ සීමාව ඉක්මවා යාම හේතුවෙන්, ඉතාලියට පනවා ඇති විනය ක්රියාමාර්ගවලින් නිදහස් වීමට අගමැතිනී ජෝර්ජියා මෙලෝනි ප්රමුඛ රජය තබා තිබූ බලාපොරොත්තු මෙම දත්ත නිකුත් වීමත් සමඟ බිඳ වැටී තිබේ.
යුරෝපා කොමිසම වෙත නිල වශයෙන් ඉදිරිපත් කර ඇති මෙම දත්තවලට අනුව, 2024 වසරේ පැවති 3.4% ක අයවැය හිඟය හා සසඳන විට යම් අඩුවීමක් පෙන්නුම් කළද, එය තවමත් නියමිත සීමාවට වඩා ඉහළ මට්ටමක පවතී. අයවැය හිඟය “අධික” ලෙස පවතින රටවල් සම්බන්ධයෙන් යුරෝපා සංගමය අනුගමනය කරන දැඩි නීතිරීති හමුවේ මෙලෙස සීමාව ඉක්මවා යාම ඉතාලියේ ඉදිරි මූල්ය උපායමාර්ගවලට තීරණාත්මක බලපෑමක් වනු ඇත.
විශේෂයෙන්ම මැදපෙරදිග යුද වාතාවරණය හමුවේ ගෝලීය ආර්ථිකය අස්ථාවර වී ඇති පසුබිමක, ඉතාලිය වැනි යුරෝපීය බලවතෙකු සිය අයවැය පාලනය කරගැනීමට අපොහොසත් වීම ආයෝජකයන්ගේ විශ්වාසය කෙරෙහි ද බලපෑම් එල්ල කළ හැකිය. මෙම නවතම දත්ත හමුවේ රෝමයේ පාලන අධිකාරියට සිය වියදම් කපා හැරීමට හෝ ආදායම් මාර්ග ඉහළ නංවා ගැනීමට යුරෝපා සංගමය වෙතින් දැඩි බලපෑම් එල්ල වනු ඇතැයි අපේක්ෂා කෙරේ.
