ශ්රී ලංකා ආර්ථික ඉතිහාසයේ සුවිශේෂී සන්ධිස්ථානයක් සනිටුහන් කරමින්, මෙරට ඒක පුද්ගල දළ දේශීය ආදායම ප්රථම වතාවට ඇමරිකානු ඩොලර් 5,000 සීමාව ඉක්මවා ගොස් තිබේ. 2025 වසර සඳහා වන මහ බැංකු වාර්ෂික ආර්ථික විවරණයට අනුව මෙම ඓතිහාසික වර්ධනය වාර්තා වී ඇත.
2024 වසරේ ඩොලර් 4,546ක්ව පැවති ඒක පුද්ගල ආදායම, 2025 වසර අවසන් වන විට ඩොලර් 5,003ක් දක්වා ඉහළ ගොස් තිබේ. මෙය වසරක් තුළ ඩොලර් 457ක සැලකිය යුතු වර්ධනයකි.
මීට පෙර මෙරට ඉහළම ඒක පුද්ගල ආදායම වාර්තා වූයේ 2018-2019 කාලසීමාවේදී වන අතර එය ඩොලර් 4,000 සීමාවේ පැවතුණි. කෙසේ වෙතත්, 2022 වසරේ ඇති වූ ආර්ථික අර්බුදය හමුවේ එය ඩොලර් 3,464 දක්වා පහත වැටුණි. එතැන් සිට වත්මන් රජයේ ආර්ථික කළමනාකරණය යටතේ 2023 දී ඩොලර් 3,818ක් සහ 2024 දී ඩොලර් 4,546ක් ලෙස එය අනුපිළිවෙලින් වර්ධනය විය.
ජනාධිපති සහ මුදල් අමාත්ය අනුර කුමාර දිසානායක මහතා ප්රමුඛ රජය විසින් අනුගමනය කරන ලද මූල්ය විනය සහ ප්රතිසංස්කරණ වැඩපිළිවෙළ මෙම ස්ථාවරත්වයට සෘජුවම බලපා ඇති බව ආර්ථික විශ්ලේෂකයෝ පෙන්වා දෙති. විශේෂයෙන්ම සංචාරක කර්මාන්තයේ ප්රබෝධය, විදේශ ප්රේෂණ ඉහළ යාම සහ අපනයන ආදායම ස්ථාවර වීම මෙම ඩොලර් 5,000 සීමාව පසු කිරීමට ප්රධාන වශයෙන් දායක වී තිබේ.
මෙම වර්ධනයත් සමඟ ශ්රී ලංකාව නැවතත් ඉහළ මධ්යම ආදායම් ලබන රටක් (Upper-Middle Income Country) ලෙස ශක්තිමත් පදනමක් ගොඩනගා ගැනීමට සමත්ව ඇත.
