ටෙලිග්රෑම් (Telegram) පණිවුඩ හුවමාරු යෙදුමේ නිර්මාතෘ පවෙල් ඩූරොව් (Pavel Durov) තමන්ට රුසියාවෙන් අපරාධ නඩුවකට අදාළව “සැකකරුවෙකු” ලෙස නම් කරමින් සිතාසි නිකුත් කර ඇති බව ප්රකාශ කළේය. බදාදා (අප්රේල් 22) ටෙලිග්රෑම් සටහනක් තබමින් ඔහු කියා සිටියේ වසර 20කට පෙර තමන් පදිංචිව සිටි රුසියාවේ පැරණි ලිපිනයකට මෙම සිතාසිය එවා ඇති බවයි.
රුසියානු බලධාරීන් පසුගිය පෙබරවාරි මාසයේ සිට ටෙලිග්රෑම් යෙදුම පාලනය කිරීමට දැඩි උත්සාහයක නිරත වන අතර එහිදී ඩූරොව්ට එරෙහිව ත්රස්තවාදයට අනුබල දීමේ චෝදනා යටතේ පරීක්ෂණ පවත්වන බව රජයේ පුවත්පත් මඟින් නිවේදනය කර තිබුණි. රුසියානු ෆෙඩරල් ආරක්ෂක සේවය (FSB) විසින් මෙම යෙදුම “දෙමුහුන් තර්ජනයක්” (Hybrid threat) ලෙස හඳුන්වා දී ඇත.
තමන්ට ලැබුණු සිතාසිය පිළිබඳව හාස්යයෙන් ප්රතිචාර දක්වමින් ඩූරොව් පවසා සිටියේ අදහස් ප්රකාශ කිරීමේ නිදහස සහ පෞද්ගලික ලිපි ගනුදෙනු කිරීමේ අයිතිය තහවුරු කරන රුසියානු ආණ්ඩුක්රම ව්යවස්ථාවේ වගන්ති ආරක්ෂා කිරීම සම්බන්ධයෙන් තමන් වරදකරුවෙකු වීමට ලැබීම ගැන ආඩම්බර වන බවයි.
සක්රීය පරිශීලකයින් බිලියනයකට වඩා සිටින ටෙලිග්රෑම් යෙදුම රුසියාවේ සහ යුක්රේනයේ බහුලව භාවිත වේ. රුසියානු රජය ටෙලිග්රෑම් අවහිර කර ඒ වෙනුවට MAX නමින් රජයේ අනුග්රහය සහිත විකල්ප යෙදුමක් වෙත ජනතාව යොමු කිරීමට උත්සාහ කරමින් සිටී. කෙසේ වෙතත් බටහිර හෝ යුක්රේන බුද්ධි අංශ සමඟ එක්ව කටයුතු කරන බවට රුසියාව නගන චෝදනා ටෙලිග්රෑම් සමාගම දිගින් දිගටම ප්රතික්ෂේප කරයි.
