උතුරු කොරියාව සහ රුසියාව අතර ද්විපාර්ශ්වික සබඳතා තවදුරටත් ශක්තිමත් කරමින්, දෙරට යා කරන නව මහාමාර්ග පාලම ළඟදීම විවෘත කිරීමට නියමිත බව උතුරු කොරියානු රාජ්ය මාධ්ය (KCNA) වාර්තා කරයි. ටුමෙන් (Tumen) නදිය හරහා ඉදිකර ඇති මීටර් 850ක් දිගැති මෙම පාලම මඟින් දෙරට අතර සංචාරක කටයුතු, වෙළඳාම සහ ජනතාවගේ ගමනාගමනය ඉහළ නැංවීමට අපේක්ෂා කෙරේ. 2024 වසරේදී ජනාධිපති ව්ලැඩිමීර් පුටින්ගේ උතුරු කොරියානු සංචාරය අතරතුර මෙයට එකඟතාව පළ වූ අතර, රුසියානු තානාපති කාර්යාලයට අනුව එළඹෙන ජූනි 19 වනදා මෙහි වැඩකටයුතු සම්පූර්ණයෙන් අවසන් කිරීමට නියමිතය.
මෙම නව මහාමාර්ග පාලම ඉදිකර ඇත්තේ 1959 වසරේ සිට ක්රියාත්මක වන පැරණි “මිත්රත්ව පාලම” නමැති දුම්රිය පාලමට යාබදව වන අතර, එය රුසියාවේ ප්රධාන මහාමාර්ග පද්ධතිය සමඟ සෘජුව සම්බන්ධ වේ. මෙම පාලම හරහා දිනකට මෝටර් රථ 300කට පමණ ගමන් කළ හැකි අතර එමඟින් ව්ලැඩිවොස්ටොක් නගරයේ සිට උතුරු කොරියාවේ රේසන් නගරය දක්වා ඇති දුර කිලෝමීටර් 320 දක්වා අඩු වෙයි. උතුරු කොරියාව සහ රුසියාව අතර යුදමය සහ ආර්ථික සහයෝගීතාව වර්ධනය වෙමින් පවතින පසුබිමක මෙම පාලම විවෘත කිරීම විශේෂත්වයකි. මීට අමතරව, වසර හයක විරාමයකින් පසු චීනය ද උතුරු කොරියාව සමඟ සිය දේශසීමා දුම්රිය සේවාවන් යළි ආරම්භ කර තිබේ.
