ප්රභූවරුන් සහ සාමාන්ය වැසියන් ගැවසෙන ගල්කිස්ස කඳවල පාරේ පිහිටි නිහඬ නිවසක් තුළ වසර ගණනාවක සිට සැඟවී තිබූ මාරාන්තික රහසක් වැටලීමට පානදුර වලාන මධ්යම දූෂණ මර්දන ප්රහාරක බළකාය ඊයේ (23) පස්වරුවේ සමත් වුණා. විදෙස්ගතව සැඟවී සිටින කුප්රකට පාතාල නායකයකු සහ ජාත්යන්තර මත්ද්රව්ය ජාවාරම්කරුවකු වන අධිකාරිගේ සමන්ත පෙරේරා හෙවත් ‘චුවා සමන්ත’ නමැත්තා විසින් මෙරට තුළ ක්රියාත්මක කළ ප්රධානතම මත්ද්රව්ය ජාලයේ මධ්යස්ථානයක් ලෙස මෙම නිවස භාවිතා කර ඇති බවයි වැටලීමේදී අනාවරණය වුණේ. ආරක්ෂක අංශ නිලධාරීන් ඉතා සූක්ෂම ලෙස එම පරිශ්රය වටලන විට එහි සඟවා තිබූ හෙරොයින් කිලෝග්රෑම් තුනයි ග්රෑම් එකසිය පනහක දැවැන්ත තොගයක් සොයා ගැනීමට හැකි වූ අතර එම මත්ද්රව්යවල වර්තමාන වෙළෙඳපොළ වටිනාකම රුපියල් කෝටි නවයකට අධික බවට ගණන් බලා තිබෙනවා.
මෙම මෙහෙයුමේදී ‘ටූටෝන්’ යන අන්වර්ථ නාමයෙන් හඳුන්වන 49 හැවිරිදි ප්රධාන ජාවාරම්කරුවකු ද අත්අඩංගුවට ගැනීමට පොලිසිය සමත් වූ අතර ඔහු දෙහිවල ප්රදේශයේ පදිංචිකරුවෙක්. දීර්ඝ කාලයක් තිස්සේ දේවින්ද නමැති තවත් ජාවාරම්කරුවකු යටතේ පුහුණුව ලබා ඇති මෙම සැකකරු, චුවා සමන්තගේ මත්ද්රව්ය බෙදාහැරීමේ ජාලයේ ප්රධාන පුරුකක් ලෙස කටයුතු කරමින් සිටි බවයි මූලික විමර්ශනවලදී තහවුරු වී ඇත්තේ. පොලිස්පති නීතිඥ ප්රියන්ත වීරසූරිය මහතාගේ පූර්ණ අධීක්ෂණය මත සහකාර පොලිස් අධිකාරී රොහාන් ඕලුගල මහතාගේ උපදෙස් පරිදි ප්රධාන පොලිස් පරීක්ෂක ඉන්දික වීරසිංහ ඇතුළු කණ්ඩායමක් සිදුකළ මෙම මෙහෙයුම මත්ද්රව්ය ජාලයට එල්ල කළ ප්රබල ප්රහාරයක් ලෙස සැලකෙනවා.
විදේශයක සිට මෙරට තරුණ පරපුර විනාශයට පත් කරන මත්ද්රව්ය ජාවාරම්කරුවන්ගේ ග්රහණයට හසුවී සිටින මෙවැනි ‘ගබඩාකරුවන්’ සහ ‘බෙදාහරින්නන්’ කොටු කර ගැනීම මුළු මහත් සමාජයේම ආරක්ෂාව උදෙසා ගත් තීරණාත්මක පියවරක්. අත්අඩංගුවට ගත් ‘ටූටෝන්’ නමැති සැකකරු මේ වන විට රැඳවුම් නියෝග මත තබාගෙන ප්රශ්න කරන අතර ඒ හරහා මෙම මත්කුඩු ජාලයට සම්බන්ධ වී සිටින සෙසු ප්රබලයන් පිළිබඳ රහස් රැසක් අනාවරණය කර ගැනීමට ආරක්ෂක අංශ සීරුවෙන් පසුවනවා. තම දරුවන්ගේ අනාගතය බිලිගන්නා මත් උවදුරට එරෙහිව ආරක්ෂක අංශ ක්රියාත්මක කරන මෙම අඛණ්ඩ මර්දනය, සුදු පිරුවටයට මුවා වී කළු සල්ලි හඹා යන සියලු ජාවාරම්කරුවන්ට එල්ල කළ ප්රබල පණිවුඩයකි.
