රුසියාව විසින් යුක්රේනය පුරා රාත්රිය පුරා එල්ල කළ ප්රබල මිසයිල සහ ඩ්රෝන ප්රහාර මාලාවකින් අවම වශයෙන් පුද්ගලයින් හත් දෙනෙකු මියගොස් ඇති බව වාර්තා වේ. මධ්යම යුක්රේනයේ ඩිනිප්රෝ (Dnipro) නගරයේ පිහිටි මහල් නිවාස සංකීර්ණයකට එල්ල වූ ප්රහාරයකින් පුද්ගලයින් පස් දෙනෙකු ජීවිතක්ෂයට පත් වූ අතර, තවත් පිරිසක් සුන්බුන් අතර සිරවී සිටින බවට සැක කෙරේ. මීට අමතරව උතුරුදිග චර්නිහිව් (Chernihiv) නගරයේදී තවත් පුද්ගලයින් දෙදෙනෙකු මියගොස් ඇති බව බලධාරීහු තහවුරු කරති.
මෙම ප්රහාරය එල්ල වන අවස්ථාවේදී රුමේනියානු දේශසීමාව ආසන්නයේ රුසියානු ඩ්රෝන යානා හඳුනා ගැනීමත් සමඟ රුමේනියාවේ ස්ථාපිත කර තිබූ බ්රිතාන්ය ප්රහාරක ජෙට් යානා ද අහසට නැංවීමට පියවර ගෙන තිබුණි. යුක්රේන ජනාධිපති වොලොඩොමියර් සෙලෙන්ස්කි ප්රකාශ කළේ රුසියාව විසින් ඩ්රෝන යානා 600කට අධික සංඛ්යාවක් සහ බැලිස්ටික් මිසයිල යොදා ගනිමින් නේවාසික ගොඩනැගිලි මෙන්ම බලශක්ති පද්ධති ඉලක්ක කර මෙම ප්රහාරය එල්ල කළ බවයි.
ප්රහාරයට ප්රතිචාර වශයෙන් යුක්රේනය ද රුසියාවේ අභ්යන්තරයට කිලෝමීටර් 1600ක් පමණ දුරින් පිහිටි යෙකටරින්බර්ග් (Yekaterinburg) වැනි නගර වෙත සිය දීර්ඝතම ඩ්රෝන ප්රහාර එල්ල කර තිබේ. මේ අතර යුක්රේන ජනාධිපතිවරයා සෞදි අරාබියේ ඔටුන්න හිමි මොහොමඩ් බින් සල්මාන් කුමරු හමු වී ගුවන් ආරක්ෂක පද්ධති ශක්තිමත් කර ගැනීම පිළිබඳව සාකච්ඡා කර ඇත. රුසියාව සහ යුක්රේනය අතර සාම සාකච්ඡා ඇනහිට ඇති පසුබිමක දෙපාර්ශවයම සිය යුදමය ශක්තිය ප්රදර්ශනය කරමින් සිටින බව විචාරකයෝ පවසති.
