මෙම වසරේ ඇමරිකා එක්සත් ජනපදයේ සත්කාරකත්වයෙන් පැවැත්වෙන ෆිෆා (FIFA) ලෝක කුසලාන පාපන්දු තරගාවලිය ඉලක්ක කරගනිමින් එල්ල විය හැකි ඩ්රෝන යානා ප්රහාර (Drone Threats) මැඩලීම සඳහා ජාතික ආරක්ෂක බලකාය හෙවත් ‘නැෂනල් ගාඩ්’ (National Guard) සෙබළුන් යෙදවීමට පියවර ගන්නා ලෙස ඇමරිකානු කොංග්රස් මණ්ඩල සභිකයින් දෙදෙනෙකු ට්රම්ප් පාලනාධිකාරියෙන් ඉල්ලා සිටී.
රිපබ්ලිකන් පක්ෂයේ මයිකල් මැකෝල් සහ එලයිජා ක්රේන් යන කොංග්රස් සභිකයින් විසින් මෙම ඉල්ලීම සිදු කර ඇත්තේ ස්වදේශ ආරක්ෂක ලේකම්වරයා සහ පෙන්ටගනය වෙත ලිපියක් යොමු කරමිනි. ඇමරිකාවේ නගර 11ක පැවැත්වෙන මෙම තරගාවලිය සඳහා ඒකාබද්ධ ෆෙඩරල් ආරක්ෂක පද්ධතියක් (Unified Security Posture) අවශ්ය බවත්, එහිදී ඩ්රෝන මර්දන කටයුතු සඳහා නැෂනල් ගාඩ් බලකාය සතු අත්දැකීම් සහ තාක්ෂණය ඉතා වැදගත් වන බවත් ඔවුන් පෙන්වා දෙයි.
පසුගිය සෙනසුරාදා වොෂින්ටනයේ පැවති විශේෂ උත්සවයකදී සිදුවූ වෙඩි තැබීමේ සිද්ධියත් සමඟ ලෝක කුසලාන තරගාවලියේ ආරක්ෂාව පිළිබඳව ලෝකය පුරා දැඩි අවධානයක් යොමු වී තිබේ. කෙසේ වෙතත් ධවල මන්දිරය අවධාරණය කරන්නේ මෙම තරගාවලිය ඉතිහාසයේ ආරක්ෂිතම ක්රීඩා උළෙල බවට පත් කිරීමට ජනාධිපති ට්රම්ප් උපරිම කැපවීමෙන් කටයුතු කරන බවයි. ලොව පුරා නරඹන්නන් ලක්ෂ සංඛ්යාත පිරිසක් පැමිණෙන මෙම දැවැන්ත ක්රීඩා උළෙලේ ගුවන් සීමාවන් සුරක්ෂිත කිරීම සඳහා මෙම යෝජනාව තීරණාත්මක වනු ඇතැයි විශ්වාස කෙරේ.
