Bitcoin ජාලයේ නවතම ‘Hard Fork’ ව්යාපෘතියක් ලෙස සැලකෙන ‘eCash’, එහි සමාරම්භයටත් පෙර දැඩි මතභේදයට ලක්ව තිබේ. මෙයට ප්රධානතම හේතුව වී ඇත්තේ Bitcoin නිර්මාතෘ සතෝෂි නකමොටෝ (Satoshi Nakamoto) සතු යැයි විශ්වාස කෙරෙන මුල්කාලීන කාසි (Coins) නව ජාලයක් හරහා ප්රතිබෙදා හැරීමට එහි සංවර්ධකයින් ගෙන ඇති තීරණයයි.
LayerTwo Labs හි ප්රධාන විධායක නිලධාරී පෝල් ස්ටෝර්ක් (Paul Sztorc) පවසන්නේ Bitcoin හි ගනුදෙනු ඉතිහාසය ඒ අයුරින්ම පිටපත් කරමින් නව eCash ජාලය නිර්මාණය කරන බවයි. එහිදී සතෝෂි නකමොටෝ සතු යැයි සැලකෙන Bitcoin මිලියන 1.1ක ප්රමාණයෙන් කොටසක් නව eCash කාසි ලෙස වෙනස් ආකාරයකට බෙදා දීමට ඔහු යෝජනා කර ඇත. මෙම සැලසුම අනුව සතෝෂි වෙත eCash 600,000ක් වෙන් කෙරෙන අතර, ඉතිරි eCash 500,000 නව පද්ධතියේ සංවර්ධන කටයුතු සඳහා යොදා ගැනීමට නියමිතය.
නව ව්යාපෘති ආරම්භයේදීම අසාර්ථක වන ‘Zombie Project’ තත්ත්වයෙන් මිදීමට සහ මුල්කාලීන දායකයින් ආකර්ෂණය කර ගැනීමට මෙම පියවර ගන්නා බව ස්ටෝර්ක් පවසයි. මෙය දැනට පවතින Bitcoin වත්කම්වලට බලපෑමක් නොකරන බවත්, සිදුවන්නේ නව ජාලය තුළ පමණක් කාසි වෙන් කිරීමක් බවත් ඔහු අවධාරණය කරයි.
Bitcoin ලෝකය තුළ ඉතා සුවිශේෂී සංකේතයක් වන සතෝෂිගේ කාසි, සංවර්ධකයින්ගේ අභිමතය පරිදි වෙනස් කිරීම ව්යාපෘතියේ විශ්වසනීයත්වයට හානියක් බව විචාරකයෝ පෙන්වා දෙති. ලබන අගෝස්තු මාසයේදී eCash දියත් කිරීමට සැලසුම් කර තිබුණද, මෙම බෙදාහැරීමේ ක්රමය පිළිබඳව පවතින ගැටලුකාරී තත්ත්වය ව්යාපෘතියේ ඉදිරි ගමනට බාධාවක් වනු ඇතැයි අපේක්ෂා කෙරේ.
