අමෙරිකානු ඩොලර් මිලියන දෙකහමාරක මුදලක් අස්ථානගත වීම සම්බන්ධයෙන් රජයේ නිල ස්ථාවරය ප්රකාශ කිරීම සඳහා මුදල් අමාත්යාංශය මේ වන විට කටයුතු සූදානම් කරමින් සිටියි. මෙම සිදුවීම සම්බන්ධයෙන් රජය විසින් සිදු කරන විශේෂ පැහැදිලි කිරීම ලබන මස 05 වන දින සභාවට ඉදිරිපත් කිරීමට නියමිතව ඇත.
මුදල් හා ක්රමසම්පාදන නියෝජ්ය අමාත්ය අනිල් ජයන්ත මහතා විසින් මෙම විශේෂ ප්රකාශය පාර්ලිමේන්තුව හමුවේ තබනු ඇතැයි අමාත්යාංශ ආරංචි මාර්ග තහවුරු කරයි. අදාළ අරමුදල් අතුරුදන් වීම සම්බන්ධයෙන් දැනටමත් අභ්යන්තර විගණන පරීක්ෂණයක් ආරම්භ කර ඇති අතර එහි මූලික සොයාගැනීම් ද මෙම වාර්තාවට ඇතුළත් වනු ඇතැයි අපේක්ෂා කෙරේ. මහජන මුදල් අවභාවිත වීමක් හෝ පද්ධතියේ පවතින දෝෂයක් හේතුවෙන් මෙම අස්ථානගත වීම සිදු වූයේද යන්න පිළිබඳව රජය මෙහිදී කරුණු පැහැදිලි කිරීමට නියමිතය.
විපක්ෂය විසින් මතු කරන ලද මෙම මූල්ය ගැටලුව සම්බන්ධයෙන් විනිවිදභාවයකින් යුතුව කරුණු දැක්වීම මෙම ප්රකාශයේ මූලික අරමුණයි. කෙසේ වෙතත් ජනමාධ්ය නියෝජ්ය අමාත්ය කෞෂල්යා ආරියරත්න මහත්මිය ඊයේ ප්රකාශ කර තිබුණේ මෙම සිදුවීම සම්බන්ධයෙන් ජනාධිපති අනුර කුමාර දිසානායක මහතා පාර්ලිමේන්තුව අමතා විශේෂ ප්රකාශයක් කිරීමට නියමිත බවයි.
