විෂ මත්ද්රව්ය ව්යසනය මෙරටින් සම්පූර්ණයෙන්ම තුරන් කිරීම සඳහා අවශ්ය නීති සංශෝධන ඇතුළු සියලු ප්රතිසංස්කරණ කඩිනමින් ක්රියාත්මක කරන ලෙස ජනාධිපති අනුර කුමාර දිසානායක මහතා සියලුම අංශවලට දැඩි උපදෙස් ලබා දී තිබේ. ජනාධිපති කාර්යාලයේදී ඊයේ පැවැති “රටම එකට” ජාතික මෙහෙයුම් සභාවේදී ජනාධිපතිවරයා අවධාරණය කළේ අත්අඩංගුවට ගන්නා මත්ද්රව්ය යළි සමාජගත වීම වැළැක්වීමටත්, ඒවා නිසි පරිදි විනාශ කිරීමටත්, වරදකරුවන්ට දඬුවම් දීමේ ක්රියාවලිය වේගවත් කිරීමටත් වහාම පියවර ගත යුතු බවයි.
“රටම එකට” ජාතික මෙහෙයුම ආරම්භ කිරීමෙන් පසුව මත්ද්රව්ය වැටලීම් 80%කින් ඉහළ ගොස් ඇති බව මෙහිදී අනාවරණය වූ අතර, පසුගිය කාලය තුළ ගංජා කිලෝ 5,437කට අධික ප්රමාණයක් සහ හෙරොයින් කිලෝ 1,936කට අධික ප්රමාණයක් ඇතුළු මත්ද්රව්ය විශාල තොගයක් සමඟ සැකකරුවන් 168,460ක් අත්අඩංගුවට ගෙන තිබේ. මත්ද්රව්ය නඩු සඳහා වෙනම අධිකරණයක් පිහිටුවීම සහ රස පරීක්ෂක වාර්තා ලබා ගැනීම වේගවත් කිරීම පිළිබඳව ද ජනාධිපතිවරයා මෙහිදී විශේෂ අවධානයක් යොමු කළේය.
මත්ද්රව්යවලට ඇබ්බැහි වූවන් පුනරුත්ථාපනය කර ඔවුන්ට රැකියා පුහුණුව ලබා දී යළි සමාජගත කිරීමේ වැඩපිළිවෙළක් ද රජය විසින් ක්රියාත්මක කර ඇත. ප්රාදේශීය ලේකම් කොට්ඨාස මට්ටමින් මත්ද්රව්ය නිසා පීඩාවට පත් පවුල් හඳුනාගෙන ඔවුන්ට සහාය වීම සහ පාසල් දරුවන් ඉලක්ක කරගත් සංවිධානාත්මක මත්ද්රව්ය ජාල මැඬලීමට අධ්යාපන අමාත්යාංශය සමඟ එක්ව විශේෂ වැඩපිළිවෙළක් ක්රියාත්මක කරන ලෙස ද ජනාධිපතිවරයා මෙහිදී වැඩිදුරටත් උපදෙස් ලබා දුන්නේය.
