ලෝක පාපන්දු ඉතිහාසයේ දැවැන්තම මංගල්යය ලෙස සැලකෙන 2026 ෆීෆා ලෝක කුසලාන තරගාවලිය ඇමරිකා එක්සත් ජනපදය, කැනඩාව සහ මෙක්සිකෝව යන රටවල් ත්රිත්වයේ සත්කාරකත්වයෙන් ආරම්භ වීමට සියලු කටයුතු සූදානම්ව පවතී. මෙවර තරගාවලිය සුවිශේෂී වන්නේ ලෝක කුසලාන ඉතිහාසයේ ප්රථම වතාවට රටවල් තුනක සත්කාරකත්වයෙන් සහ කණ්ඩායම් 32 සිට 48 දක්වා ඉහළ නංවමින් පැවැත්වෙන පළමු තරගාවලිය මෙය වන බැවිනි. මේ හේතුවෙන් මුළු තරග සංඛ්යාව 64 සිට 104 දක්වා ඉහළ ගොස් ඇති අතර උතුරු ඇමරිකාවේ නගර 16 ක් පුරා මෙම පාපන්දු උන්මාදය පැතිර යනු ඇත. ශ්රී ලාංකීය ප්රේක්ෂකයන්ට මෙහිදී වැදගත් වන කරුණ වන්නේ තරග පැවැත්වෙන වේලාවන් වන අතර, උතුරු ඇමරිකානු වේලා කලාපයන්ට අනුව බොහෝ තරග ශ්රී ලංකා වේලාවෙන් මධ්යම රාත්රියේ හෝ අලුයම් කාලයේ සජීවීව නැරඹීමට අවස්ථාව ලැබෙනු ඇත.
තරගාවලියේ සමාරම්භක තරගය 2026 ජුනි 11 වනදා මෙක්සිකෝවේදී පැවැත්වීමට නියමිත අතර අවසාන මහා තරගය ජූලි 19 වනදා නිව්යෝර්ක් නිව් ජර්සි ක්රීඩාංගණයේදී පැවැත්වේ. මෙවර හඳුන්වා දී ඇති නව ආකෘතියට අනුව කණ්ඩායම් 48ක් කාණ්ඩ 12ක් යටතේ තරග වදින අතර සෑම කාණ්ඩයකින්ම මුල් ස්ථාන දෙක ලබා ගන්නා කණ්ඩායම් සහ හොඳම තෙවන ස්ථානලාභී කණ්ඩායම් 8ක් පිළිමලුන් පිටුදැකීමේ වටයට (Round of 32) සුදුසුකම් ලබයි. මෙවර තරගාවලියේදී උස්බෙකිස්තානය, ජෝර්දානය, කුරකාවෝ සහ කේප් වර්ඩේ වැනි රටවල් ප්රථම වතාවට ලෝක කුසලාන වරම් ලබා සිටීම සුවිශේෂී වන අතර ඉරාකය සහ ස්කොට්ලන්තය වැනි රටවල් දිගු කලකට පසු යළිත් ලෝක කුසලානයට සුදුසුකම් ලබා සිටී. පාපන්දු ලෝලීන්ගේ දැඩි අවධානයට ලක්වන බ්රසීලය C කාණ්ඩයෙන් ද, ආර්ජන්ටිනාව J කාණ්ඩයෙන් ද, පෘතුගාලය K කාණ්ඩයෙන් සහ එංගලන්තය L කාණ්ඩයෙන් ද මෙවර තරග බිමට පිවිසෙයි.
