ත්රිකුණාමලය මහ රෝහලේදී සිදුවූ බිළිඳු මරණයක් සම්බන්ධයෙන් පවත්වන ලද මූලික විමර්ශනයකට අනුව, එහි සේවය කළ ප්රසව හා නාරිවේද විශේෂඥ වෛද්යවරයෙකුගේ සහ ජ්යෙෂ්ඨ නේවාසික වෛද්යවරියකගේ සේවය වහාම ක්රියාත්මක වන පරිදි අත්හිටුවීමට සෞඛ්ය අමාත්යාංශය පියවර ගෙන තිබේ. රාජකාරි වේලාව තුළ සේවය පැහැර හැර පෞද්ගලික රෝහලක සේවය කිරීම ඇතුළු විෂමාචාර ක්රියාවන් කිහිපයක් සම්බන්ධයෙන් මොවුන්ට චෝදනා එල්ල වී ඇත.
පසුගිය අප්රේල් මස 09 වනදා රජයේ වෛද්ය නිලධාරීන්ගේ සංගමය ක්රියාත්මක කළ වෘත්තීය සමිති ක්රියාමාර්ගය අතරතුර සිදුවූ මෙම මරණය සම්බන්ධයෙන් අනාවරණය වී ඇත්තේ, අදාළ මවගේ ප්රසූතිය සම්බන්ධයෙන් සූතිකාගාරයේ සිට හය වතාවක් දුරකථනයෙන් දැනුම් දී තිබුණද මෙම වෛද්යවරුන් දෙදෙනා එහි පැමිණ නොමැති බවයි. මෙම වැඩ තහනමට එරෙහිව රෝහල් වෛද්යවරුන් වර්ජනයක නිරත වන බවට ප්රචාරයක් පැතිර ගියද, අද (11) දින රෝහලේ සියලු සායනික සහ ප්රතිකාර කටයුතු සාමාන්ය පරිදි සිදුවූ බව රෝහල් අධ්යක්ෂ වෛද්ය සදමාලි සමරකෝන් මහත්මිය තහවුරු කළාය.
