රට තුළ දැඩි කතාබහට ලක්වූ ශ්රී ලංකා ගුවන් සේවයේ හිටපු ප්රධාන විධායක නිලධාරී කපිල චන්ද්රසේන මහතාගේ මරණයට අදාළ අබිරහස විසඳා ගැනීම සඳහා වැදගත් විය හැකි තීරණාත්මක තොරතුරක් අනාවරණය කර ගැනීමට පොලීසිය සමත්ව තිබෙනවා. ඒ අනුව කපිල චන්ද්රසේන මහතා වෙනුවෙන් අධිකරණයට ඉදිරිපත් කළ ඇපකරුවන් මුදල් ලබාදී සම්බන්ධීකරණය කළ බව කියන 76 හැවිරිදි පුද්ගලයෙකු පොලීසිය විසින් අත්අඩංගුවට ගෙන තිබෙනවා. චන්ද්රසේන මහතාට නියම කර තිබූ ශරීර ඇප තුනෙන් දෙකක් සඳහා ඉදිරිපත් වූ සාංචි ආරච්චිවත්තේ පදිංචි මොහොමඩ් රිස්වාන් සහ මොහොමඩ් ඉර්ෂාන් නමැති පුද්ගලයන් මෙම ජාවාරම හරහා ඇපයට ඉදිරිපත් කර ඇති බවයි වාර්තා වන්නේ.
අධිකරණය නොමඟ යවමින් ව්යාජ ඇපකරුවන් ඉදිරිපත් කිරීමේ මෙම සිද්ධියත් සමඟ කපිල චන්ද්රසේන මහතාගේ මරණය පිටුපස ඇති අබිරහස් සහ ඒ හා සම්බන්ධ පුද්ගලයින් පිළිබඳව තවදුරටත් පුළුල් විමර්ශන ක්රියාත්මකයි. මෙම අත්අඩංගුවට ගැනීම මගින් මරණයට අදාළ සැඟවුණු තොරතුරු රැසක් අනාවරණය කර ගැනීමට හැකි වනු ඇති බව පොලීසිය විශ්වාසය පළ කරනවා. සිද්ධිය සම්බන්ධයෙන් අදාළ සැකකරුගෙන් මේ වන විට ප්රශ්න කිරීම් සිදුකරන අතර මෙම ජාලයට සම්බන්ධ අනෙකුත් පුද්ගලයන් සොයා මෙහෙයුම් තවදුරටත් ක්රියාත්මක වේ.
