අරනායක – අම්බලකන්ද මාර්ගයේ පිහිටි නාගුනා ඇල්ල පාලම අභ්යන්තරයට විශාල ගලක් පෙරළී වැටීම හේතුවෙන් එම ප්රදේශයේ දැඩි අවදානම් තත්වයක් මතුව තිබේ. පසුගියදා ඇති වූ ‘දිට්වා’ සුළි කුණාටුවෙන් සම්පූර්ණයෙන්ම විනාශ වූ මෙම මාර්ගය, විධිමත් ප්රතිසංස්කරණයකින් තොරව තාවකාලික පිළිසකර කිරීම් මත රථවාහන ධාවනය සඳහා විවෘත කර තිබුණි. එහෙත් මේ දිනවල පවතින තද වර්ෂාවත් සමඟ පාලමට ඉහළින් පිහිටි පැරණි නායගිය කොටසේ තිබූ විශාල ගලක් ගැලවී පාලම තුළට වැටී ජලය ගලා යාම අවහිර වී ඇත.
පවතින අවහිරතාව හේතුවෙන් ඇළ මාර්ගයේ ජලය පාලම මතින් සහ මාර්ගය හරහා ගලා යන අතර, මේ හේතුවෙන් මාර්ගය යළිත් නාය යෑමේ හෝ සම්පූර්ණයෙන්ම විනාශ වීමේ අවදානමක් පවතින බව ප්රදේශවාසීහු පෙන්වා දෙති. පහළ ප්රදේශයේ පදිංචි කරුවන් පවසන්නේ ජලය මෙලෙස මාර්ගය දිගේ ගලා යාමෙන් තම ජීවිත හා දේපළ යළිත් අනතුරට ලක්වීමේ බියක් පවතින බවයි. බලධාරීන් වහා මැදිහත් වී මෙම අවහිරතාව ඉවත් කර මාර්ගය සුරක්ෂිත කර දෙන ලෙස ජනතාව ඉල්ලා සිටිති.
