බහුබලී සහ RRR වැනි අති සාර්ථක චිත්රපට අධ්යක්ෂණය කළ එස්.එස්. රාජමෞලිගේ නවතම දැවැන්ත නිර්මාණය වන ‘වරනාසි’ චිත්රපටයේ රූගත කිරීම් හයිද්රාබාද්හිදී බාධාවකට මුහුණ දී තිබේ. 2027 වසරේ තිරගත කිරීමට අපේක්ෂිත මෙම චිත්රපටයේ වැඩ කටයුතු මෙලෙස ඇණහිට ඇත්තේ නිෂ්පාදන කණ්ඩායම ඉල්ලා සිටි විශාල ජල ප්රමාණය ලබා දීමට බලධාරීන් අනුමැතිය ලබා නොදීම හේතුවෙනි.
චිත්රපටයේ එක් දර්ශනයක් සඳහා ජල බවුසර් 150ක ප්රමාණයක් භාවිත කිරීමට නිෂ්පාදන කණ්ඩායම ඉල්ලුම් කර තිබුණද, හයිද්රාබාද් මෙට්රොපොලිටන් ජල සම්පාදන හා මලාපවහන මණ්ඩලය එම ඉල්ලීම ප්රතික්ෂේප කර ඇත. ගිම්හාන කාලයේ පවතින අධික ජල ඉල්ලුම හමුවේ නගරවාසීන්ගේ අවශ්යතාවලට ප්රමුඛත්වය දිය යුතු බවත්, ජල හිඟයක් ඇතිවීමේ අවදානම වැළැක්විය යුතු බවත් එම මණ්ඩලය අවධාරණය කර තිබේ.
මේ වන විටත් අදාළ දර්ශන තල පවා ඉදි කර අවසන්ව ඇති අතර, මණ්ඩලයේ මෙම තීරණය නිසා රූගත කිරීමේ කාලසටහනට දැඩි බලපෑමක් එල්ල වී ඇත. චිත්රපටයේ කතාවට ඉතා තීරණාත්මක වන මෙම දර්ශනය රූගත කරගත නොහැකි වීම නිසා චිත්රපට කණ්ඩායම දැඩි අසීරුතාවකට පත්ව සිටියි. ත්රාසජනක වීර කාව්යයක් ලෙස සැලකෙන මෙම චිත්රපටයේ මහේෂ් බාබු, ප්රියංකා චොප්රා ජෝනාස් සහ ප්රිත්විරාජ් සුකුමාරන් ප්රධාන චරිත නිරූපණය කරති.
