විධිමත් හා කාර්යක්ෂම රාජ්ය පාලනයක් සඳහා සත්යවාදී දත්ත සහ තොරතුරු පදනම් කරගත යුතු වුවත්, වත්මන් රජය සත්ය තොරතුරු මත ප්රතිපත්ති ක්රියාත්මක නොකරන බව විපක්ෂ නායක සජිත් ප්රේමදාස මහතා චෝදනා කරයි. අද (15) තිස්සමහාරාමයේදී ආගමික වතාවත්වලින් අනතුරුව මාධ්ය වෙත අදහස් දක්වමින් ඒ මහතා මේ බව ප්රකාශ කළේය.
වත්මන් රජය සහ ජන ලේඛන හා සංඛ්යාලේඛන දෙපාර්තමේන්තුව ඉදිරිපත් කරන දත්ත මහපොළොවේ යථාර්ථය සමඟ නොගැළපෙන බව ඔහු පෙන්වා දුන්නේය. විශේෂයෙන්ම, 2026 මාර්තු මාසයේදී පුද්ගලයෙකුට දුප්පත්කමින් තොරව ජීවත් වීමට රුපියල් 16,990ක් ප්රමාණවත් බවට ඉදිරිපත් කර ඇති දත්ත වැරදි බව ඔහු අවධාරණය කළේය. ආහාරපාන සහ අනෙකුත් අවශ්යතා සඳහා මසකට එවැනි මුදලක් ප්රමාණවත්දැයි ජනතාව ප්රශ්න කළ යුතු බව ඔහු සඳහන් කළේය.
වැරදි දත්ත මත පදනම්ව දරිද්රතා රේඛාව තීරණය කිරීම සහ සහනාධාර ලබා දීම හේතුවෙන් සැබෑ පීඩාවට පත් ජනතාවට අසාධාරණයක් වන බව ඔහු පෙන්වා දුන්නේය. රටේ 30-40%ක් අතර ප්රමාණයක් දුප්පත්කමින් පීඩා විඳින බවත්, ඔවුන් වෙනුවෙන් කෘරත්වයෙන් තොර මානුෂීය වැඩසටහනක් ක්රියාත්මක කරන ලෙසත් ඔහු රජයෙන් ඉල්ලා සිටියේය.
ජීවන වියදම ඉහළ යාම හේතුවෙන් ගොවි, ධීවර, වතු සහ නාගරික ජනතාව මෙන්ම මධ්යම පන්තිය ද දැඩි ආර්ථික පීඩනයකට ලක්ව ඇති බව ඔහු පැවසීය. එබැවින් වෛරී දේශපාලනය පසෙකලා රටේ සමස්ත ජනතාවගේ පීඩනය අවබෝධ කරගෙන නිවැරදි සංඛ්යාලේඛන මත ක්රියා කරන ලෙස විපක්ෂ නායකවරයා රජයට වැඩිදුරටත් අවධාරණය කළේය.
