ඉන්දියාව තුළ දේශීය චිප් (Chip) නිෂ්පාදන ක්ෂේත්රය වේගවත්ව ව්යාප්ත කිරීමේ අරමුණින්, එරට ප්රමුඛ පෙළේ ටාටා ඉලෙක්ට්රොනික්ස් (Tata Electronics) සමාගම සහ ලොව සුප්රසිද්ධ ඕලන්ද චිප් නිෂ්පාදන උපකරණ සමාගමක් වන ASML ආයතනය ඓතිහාසික ඒකාබද්ධ ගිවිසුමකට අත්සන් තබා තිබේ. මේ හරහා ඉන්දියාවේ ප්රථම ‘Front-end’ අර්ධ සන්නායක කර්මාන්තශාලාව (Semiconductor Fabrication Plant) ගුජරාට් ප්රාන්තයේ ඉදිකිරීමට කටයුතු සූදානම් කෙරේ.
ගුජරාටයේ ධොලේරා (Dholera) ප්රදේශයේ ඇමරිකානු ඩොලර් බිලියන 11ක (රුපියල් බිලියන 3,300කට අධික) දැවැන්ත ආයෝජනයකින් ඉදිවන ටාටා සමාගමේ මිලිමීටර් 300 ප්රමාණයේ අර්ධ සන්නායක කර්මාන්තශාලාව සඳහා ASML සමාගමේ ලොව අති දියුණු තාක්ෂණික උපකරණ සහ සහයෝගය හිමිවන බව දෙපාර්ශවයම නිල වශයෙන් ප්රකාශ කර ඇත. මෙමඟින් ස්මාර්ට් ජංගම දුරකථන, මෝටර් රථ කර්මාන්තය මෙන්ම කෘත්රිම බුද්ධිය (AI) වැනි විවිධ නවීන අංශ සඳහා අවශ්ය වන ඉහළ තාක්ෂණික චිප්ස් නිෂ්පාදනය කිරීමට නියමිතය.
ඕලන්දයේ හේග් නුවර පැවැති ද්විපාර්ශවික රාජ්ය තාන්ත්රික හමුවක් අතරතුර, ඉන්දීය අග්රාමාත්ය නරේන්ද්ර මෝදි මහතා සහ ඕලන්ද අග්රාමාත්ය රොබ් ජෙටන් (Rob Jetten) මහතා ඉදිරියේදී ටාටා සහ ASML ප්රධාන විධායක නිලධාරීන් විසින් මෙම අවබෝධතා ගිවිසුම අත්සන් තබන ලදී. දැනට පවතින ඇමරිකා – චීන තාක්ෂණික යුද්ධය සහ අපනයන සීමාවන් හේතුවෙන් ඕලන්ද චිප් සමාගම් නව වෙළෙඳපොළවල් සොයා යමින් සිටින අතර, ඉන්දියාව ද සිය චිප් නිෂ්පාදනය දියුණු කිරීම සඳහා ඩොලර් බිලියන ගණනින් සහන (Subsidies) ලබාදෙමින් සිටින පසුබිමක මෙම ගිවිසුම අත්සන් තැබීම ජාත්යන්තර තාක්ෂණික ක්ෂේත්රයේ දැඩි අවධානයට ලක්ව තිබේ.
