ජාතික ජන බලවේග (මාලිමාව) රජය යටතේ මේ වන විට රුපියල් මිලියන 1,080ක් (රුපියල් කෝටි 108ක්) හැකරුන්ට (Hackers) වංචනික ලෙස ගෙවා ඇති බව අනාවරණය වී ඇතැයි ජ්යේෂ්ඨ කථිකාචාර්ය මහින්ද පතිරණ මහතා චෝදනා කරයි. ඉදිරියේදී තවත් මෙවැනි මූල්ය වංචා සහ ගෙවීම් රැසක් හෙළිදරව් වනු ඇති බව ද ඔහු පෙන්වා දෙයි.
තම සමාජ මාධ්ය ගිණුමක සටහනක් තබමින් ඔහු ප්රකාශ කර ඇත්තේ දැනට හෙළි වී ඇති තොරතුරුවලට අනුව රජය විසින් වංචනිකයන් වෙත කෝටි 80ක්, කෝටි 20ක් සහ කෝටි 8ක් ලෙස අවස්ථා කිහිපයකදී මෙම මුදල් ගෙවා ඇති බවයි. “කොහොම හරි මේ මුදල් දැන් අපි බදු විදියට සහ විදුලි බිල, ජල බිල ඇතුළු බිල්පත් හරහා ආණ්ඩුවට ගෙවමින් ඉන්නවා. ඇත්තටම මේකට තමා පුනරුදය කියන්නෙ” යැයි පවසමින් ඔහු වත්මන් පාලනය දැඩි විවේචනයට ලක් කර තිබේ.
මෑතකදී ශ්රීලංකන් ගුවන් සමාගමේ ඩුබායි සේවා සපයන්නෙකුගේ විද්යුත් තැපෑල (Email) හැක් කරමින් සිදු වූ එක්සත් අරාබි එමීර් රාජ්යයේ ඩිරාම් 974,000ක (රුපියල් කෝටි 80කට ආසන්න) මූල්ය වංචාව සහ චෙන්නායි කාර්යාලයේ සිදු වූ ව්යාජ ලේඛන සකස් කිරීමේ වංචාව මෙන්ම මහජන බැංකුවෙන් කෝටි 65ක් වැඩිපුර ගෙවීමේ සිදුවීම් පසුබිම් කරගනිමින් දේශපාලන ක්ෂේත්රය තුළ මෙම දැඩි කතාබහ සහ චෝදනා එල්ල වෙමින් පවතී.
