සමගි ජන බලවේගය (SJB) තුළ නැවතත් අභ්යන්තර දේශපාලන අර්බුදයක් නිර්මාණය වෙමින් පවතින බවත්, පාර්ලිමේන්තුව තුළ විපක්ෂ නායක සජිත් ප්රේමදාස මහතා සිදුකරන කතාවල කාල සීමාවන් සීමා කර පක්ෂයේ සෙසු දක්ෂ කථිකයන්ට වැඩි අවස්ථාවක් ලබාදෙන ලෙස මන්ත්රීවරුන් පිරිසක් ඔහුගෙන් සෘජුවම ඉල්ලීමක් කර ඇති බවත් දේශපාලන ආරංචි මාර්ග හෙළිදරව් කරයි.
විපක්ෂයේ ප්රමුඛ පෙළේ මන්ත්රීවරුන් දස දෙනෙකු (10) පමණ එක්ව පසුගියදා පක්ෂ නායකයා හමු වී මෙම ඉල්ලීම සිදුකර ඇත. එහිදී ඔවුන් පෙන්වා දී ඇත්තේ “ඔබතුමාම හැමතිස්සෙම කතා නොකර සෙසු මන්ත්රීවරුන්ට පාර්ලිමේන්තුවේ කතා කරන්න වැඩි අවස්ථාව දෙන්න. එතකොට අපිට පුළුවන් ඔබතුමාව රටේ ඉහළම පුටුවට (ජනාධිපති ධුරය වෙත) ගෙනියන්න” යනුවෙනි. කෙසේ වෙතත්, මන්ත්රීවරුන්ගේ මෙම සංවේදී ඉල්ලීම හමුවේ විපක්ෂ නායකවරයා කිසිදු ප්රතිචාරයක් නොදක්වා නිහඬව සිට ඇති බව වාර්තා වේ.
මේ අතර, පක්ෂයේ නිලතල කඩිනමින් සංශෝධනය කරන ලෙසට මන්ත්රීවරුන්ගෙන් දිගින් දිගටම බලපෑම් එල්ල වෙමින් පවතින පසුබිමක, සමගි ජන බලවේගයේ ඇතැම් මන්ත්රීවරුන් පක්ෂ නායකත්වය සහ එහි ක්රියාකලාපය පිළිබඳව ප්රසිද්ධියේම බරපතළ විවේචන එල්ල කිරීමට පටන් ගැනීම නිසා පක්ෂය තුළ දැඩි උණුසුම්කාරී මෙන්ම අර්බුදකාරී වාතාවරණයක් මතුව ඇතැයි ද දේශපාලන ආරංචි මාර්ග වැඩිදුරටත් සඳහන් කරයි.
