දේශයේ ස්වෛරීභාවය සහ භෞමික අඛණ්ඩතාව වෙනුවෙන් සිය ජීවිත පරිත්යාගයෙන් කටයුතු කළ වීරෝදාර රණවිරුවන්ගේ උදාර ප්රාර්ථනාවන් කිසිසේත්ම පාවා නොදෙන බවත්, ඔවුන් අපේක්ෂා කළ සර්ව සාධාරණත්වය පිරි, නීතිය ගරු කරන, සංවර්ධිත සහ ආදර්ශමත් රාජ්යය ගොඩනැගීමේ ඓතිහාසික වගකීම වත්මන් රජය කොන්දේසි විරහිතව භාරගන්නා බවත් ජනාධිපති අනුර කුමාර දිසානායක මහතා අද (19) දින දැඩි අධිෂ්ඨානයෙන් යුතුව ප්රකාශ කළේය. බත්තරමුල්ල රණවිරු ස්මාරකය අභියෝගයේ අද පස්වරුවේ අතිඋත්කර්ෂවත් අන්දමින් පැවැත්වුණු 17 වැනි ජාතික රණවිරු අනුස්මරණ මහෝත්සවයේ ප්රධාන ආරාධිතයා ලෙස එක්වෙමින් ජනාධිපතිවරයා මේ බව අවධාරණය කළේය.
මෙහිදී සභාව අමතමින් අතිශය හැඟීම්බර සහ සංවේදී අදහස් දැක්වීමක නිරත වූ ජනාධිපතිවරයා කියා සිටියේ, එදා බිහිසුණු ත්රස්තවාදයෙන් මෙරට දෙකෝටියක් වූ සමස්ත ජනතාවගේම කඳුළු පිසදැමීම උදෙසා රණවිරුවන් ඉටුකළේ මිල කළ නොහැකි විශිෂ්ට මෙහෙවරක් බවයි. යුද්ධය හේතුවෙන් අදටත් තම පියා, සැමියා හෝ දරුවන් අහිමිව වීර ස්මාරකය ඉදිරිපිට සුසුම් හෙළන රණවිරු පවුල්වල සාමාජිකයින්ගේ දරාගත නොහැකි වේදනාව තමන් මැනවින් වටහා ගන්නා බව පැවසූ ජනාධිපතිවරයා, මියගිය සහ ආබාධිත රණවිරුවන්ට හුදෙක් උපහාර සහ ගෞරව දැක්වීමෙන් පමණක් ජීවත්ව සිටින අපේ වගකීම අවසන් නොවන බව පෙන්වා දුන්නේය. යුද්ධයේ බිහිසුණු ප්රතිවිපාක උතුරේ මෙන්ම දකුණේ ද සියලුම ජාතීන්ට අත්විඳීමට සිදුවූයේ අවස්ථාවාදී, බලලෝභී දේශපාලනඥයින්ගේ සහ අන්තවාදීන්ගේ අශිෂ්ට න්යාය පත්රයන් නිසා බවත්, මින් ඉදිරියට කිසිදු මවකට හෝ බිරිඳකට තම දරුවා හෝ සැමියා යුද බිමට කැඳවන මාරාන්තික වටපිටාවක් රට තුළ ඇති නොවන සේ නැවත කිසිදාක යුද්ධයක් ඇති නොවන පරිදි වගබලා ගැනීම රජයේ ප්රධානතම අරමුණ බවත් හෙතෙම සපථ කළේය.
