ශ්රීලන්කන් ගුවන් සේවයේ හිටපු ප්රධාන විධායක නිලධාරි කපිල චන්ද්රසේන මහතාගේ සැකකටයුතු මරණය සම්බන්ධයෙන් වන මහේස්ත්රාත් පරීක්ෂණය අද (19) කොටුව මහේස්ත්රාත් අධිකරණයේදී තෙවැනි දිනටත් විභාගයට ගැනුණි.
මෙහිදී මරණකරුට ඇප තැබූ පුද්ගලයන් (දැනට රිමාන්ඩ් භාරයේ පසුවන) දෙදෙනාගෙන් මෙතෙක් ප්රකාශ සටහන් කර නොගැනීම සම්බන්ධයෙන් මහේස්ත්රාත්වරයා කොළඹ අපරාධ කොට්ඨාසයට දැඩි ලෙස දෝෂාරෝපණය කළේය. “රිමාන්ඩ් භාරයේ ඉන්නවා නම් අධිකරණ නියෝගයක් අරගෙන ප්රකාශයක් ගන්න තවත් ලේසියි. ඒ අයගෙන් ප්රකාශ සටහන් කරගත්තේ නැත්නම් විමර්ශනය කරන්නේ කොහොමද?” යැයි මහේස්ත්රාත්වරයා ප්රශ්න කළේය.
විමර්ශන නිලධාරීන් මෙහිදී දන්වා සිටියේ මරණය සිදුවූ නිවසේ මෙන්ම මරණකරු පදිංචිව සිටි නිවසේ ද සී.සී.ටී.වී. (CCTV) දත්ත ගබඩා වී නොමැති බවයි. ඒ අනුව, අදාළ ඩී.වී.ආර් (DVR) යන්ත්ර සහ සිද්ධිය වූ ස්ථානයේ තිබී හමු වූ නාඳුනන ඖෂධ පෙති වර්ග රජයේ රස පරීක්ෂකවරයා වෙත යොමු කිරීමට අධිකරණ අවසරය හිමිවිය.
අද දින සාක්ෂි දුන් ඩර්ඩන්ස් රෝහලේ හෙද නිලධාරියා ප්රකාශ කළේ තමන් යන විට ලයිට් නිවා තිබූ කාමරයක බිම දිගාවී සිටි මරණකරුගේ බෙල්ලේ රෙදි පටියක් ගැටගසා තිබූ බවයි. අරවින්ද ද සිල්වා මහතාගේ නිවසේ සේවකයා සාක්ෂි දෙමින් කියා සිටියේ මැයි 07 වැනිදා මියයෑමට පෙර රාත්රී 1.30 ට පමණ කපිල චන්ද්රසේන මහතා සුදු පැහැති බෝතලයක් අතැතිව වතුර ලබාගැනීමට සිටිනු තමන් දුටු බවයි. වැඩිදුර සාක්ෂි විභාගය මැයි මස 22 වනදා දක්වා කල් තැබිණි.
