අධිවේගී මාර්ගවල නඩත්තු පිරිවැය සහ බිලියන 16ක දැවැන්ත ආදායම පාර්ලිමේන්තුවේදී හෙළිවෙයි

ලංකාවේ සමස්ත අධිවේගී මාර්ග පද්ධතියේ වාර්ෂික නඩත්තු පිරිවැය සහ ඉන් ලැබුණු සමස්ත ආදායම් වාර්තාවන් ප්‍රවාහන, මහාමාර්ග හා නාගරික සංවර්ධන අමාත්‍ය බිමල් රත්නායක මහතා විසින් අද (20) පාර්ලිමේන්තුවේදී නිල වශයෙන් අනාවරණය කළේය. පාර්ලිමේන්තු මන්ත්‍රී රවී කරුණානායක මහතා මතු කරන ලද ප්‍රශ්නයකට සෘජුව පිළිතුරු ලබාදෙමින් අමාත්‍යවරයා මේ බව සභාවට දැනුම් දුන්නේය.

ඒ අනුව ලංකාවේ ක්‍රියාත්මක කිලෝමීටර් 312.57ක සමස්ත අධිවේගී මාර්ග පද්ධතිය නඩත්තු කිරීම සඳහා රුපියල් මිලියන 5,180.90ක පිරිවැයක් වැයවී තිබේ. මාර්ග අංශ අනුව නඩත්තු පිරිවැය සැලකීමේදී, කොට්ටාව සිට මත්තල දක්වා දිවෙන දක්ෂිණ අධිවේගී මාර්ගයට (කිලෝමීටර් 200.45) රුපියල් මිලියන 2,024.5ක් ද, කොට්ටාව සිට කෙරවලපිටිය දක්වා පිටත වටරවුම් මාර්ගයට (කිලෝමීටර් 28.86) රුපියල් මිලියන 767.6ක් ද, පෑලියගොඩ සිට සීදූව දක්වා කොළඹ – කටුනායක අධිවේගී මාර්ගයට (කිලෝමීටර් 25. රුපියල් මිලියන 834.1ක් ද වැයවී ඇත. මීට අමතරව මීරිගම සිට කුරුණෑගල දක්වා මධ්‍යම අධිවේගී මාර්ගයට (කිලෝමීටර් 40.91) රුපියල් මිලියන 531.00ක් සහ අන්දරවැව සිට හම්බන්තොට දක්වා දක්ෂිණ අධිවේගී මාර්ග දිගුවට (කිලෝමීටර් 16.55) රුපියල් මිලියන 1,022.70ක පිරිවැයක් දරා තිබේ.

කෙසේ වෙතත්, මෙම පිරිවැය හමුවේ අධිවේගී මාර්ගවලින් රජයට ලැබුණු ආදායම ඉතා ඉහළ මට්ටමක පවතින බව අමාත්‍යවරයා පෙන්වා දුන්නේය. ඒ අනුව 2025 වර්ෂයේ ජනවාරි 01 සිට දෙසැම්බර් 31 දක්වා කාලය තුළ සමස්ත අධිවේගී මාර්ග ජාලයෙන් රුපියල් මිලියන 16,330.14ක (බිලියන 16කට වැඩි) ආදායමක් උපයා ඇත. එහිදී දක්ෂිණ අධිවේගී මාර්ගයෙන් රුපියල් මිලියන 5,031.28ක්, පිටත වටරවුම් මාර්ගයෙන් රුපියල් මිලියන 4,347.32ක්, කොළඹ – කටුනායක අධිවේගී මාර්ගයෙන් රුපියල් මිලියන 3,355.12ක්, දක්ෂිණ අධිවේගී මාර්ග දිගුවෙන් රුපියල් මිලියන 2,019.45ක් සහ මධ්‍යම අධිවේගී මාර්ගයෙන් රුපියල් මිලියන 1,576.97ක් වශයෙන් ආදායම් වාර්තා වී තිබේ. නඩත්තු පිරිවැය මෙන් තුන් ගුණයකට වඩා වැඩි ආදායමක් අධිවේගී මාර්ගවලින් උපයා ගැනීම කැපී පෙනෙන තත්ත්වයකි.