කළු මුහුදට ඉහළ ජාත්යන්තර ගුවන් සීමාවේදී අවි රහිත බ්රිතාන්ය රාජකීය ගුවන් හමුදාවට අයත් ඔත්තු බැලීමේ යානයකට, රුසියානු ප්රහාරක ජෙට් යානා දෙකක් “දිගින් දිගටම සහ අතිශය භයානක ලෙස” බාධා කර ඇති බව බ්රිතාන්ය ආරක්ෂක අමාත්යාංශය ප්රකාශ කරයි. පසුගිය මාසයේදී සිදුව ඇති මෙම අනතුරුදායක මැදිහත්වීම, 2022 වසරෙන් පසු රුසියාව විසින් සිදු කරන ලද වඩාත්ම අවදානම් සහගත ගුවන් මැදිහත්වීම ලෙස ආරක්ෂක අමාත්යාංශය හඳුන්වා දී තිබේ.
මෙහිදී බ්රිතාන්යයට අයත් ‘RC-135W Rivet Joint’ වර්ගයේ නිරීක්ෂණ යානය අසලට පැමිණි රුසියානු ‘Su-35’ වර්ගයේ ප්රහාරක යානයක්, බ්රිතාන්ය යානයේ හදිසි අනතුරු ඇඟවීමේ පද්ධති ක්රියාත්මක කරවීමට සහ ස්වයංක්රීය නියමු පද්ධතිය (Autopilot) අක්රීය කිරීමට තරම් සමීප වී ඇත. මීට අමතරව තවත් රුසියානු ‘Su-27’ වර්ගයේ ජෙට් යානයක් බ්රිතාන්ය යානයේ ඉදිරිපසින් මීටර් 6ක් තරම් ඉතා ආසන්නයෙන් හය වතාවක්ම පියාසර කර තිබේ.
මෙම සිදුවීම දැඩි ලෙස හෙළා දකිමින් අදහස් දැක්වූ බ්රිතාන්ය ආරක්ෂක ලේකම් ජෝන් හීලි (John Healey), රුසියානු නියමුවන්ගේ මෙම පිළිගත නොහැකි හැසිරීම් හමුවේ බ්රිතාන්ය ගුවන් හමුදා කාර්ය මණ්ඩලය පෙන්වූ විශිෂ්ට වෘත්තීයභාවය අගය කර සිටියේය. මෙම ක්රියාවන් නිසා බරපතළ අනතුරු මෙන්ම කලාපීය තත්ත්වය තවදුරටත් උග්ර වීමේ අවදානමක් නිර්මාණය වන බව පැවසූ ඔහු, කෙසේ වෙතත් මෙමඟින් නේටෝ (NATO) සංවිධානය සහ සිය මිත්ර රටවල් ආරක්ෂා කිරීමට බ්රිතාන්යය සතු කැපවීම කිසිසේත් අඩාල කළ නොහැකි බව ද අවධාරණය කළේය. මේ සම්බන්ධයෙන් බ්රිතාන්ය ආරක්ෂක සහ විදේශ අමාත්යාංශ එක්ව ලන්ඩන් නුවර පිහිටි රුසියානු තානාපති කාර්යාලයෙන් නිල වශයෙන් විරෝධය පළ කර තිබේ.
